真人真事改篇﹕師生戀﹕《最接近的陌生距離》: 第五章之一

撞鬼呀呢次！

我⋯⋯鍾意咗Miss?痴線架咩！而家嘅我好似分裂出兩個人格咁，一邊就鬧我被Miss迷到痴咗線；另一邊不斷回憶Miss嘅一切，控制唔到心動嘅感覺！

我唔係未試過暗戀人，所以我好肯定而家內心嘅感動、心跳同大腦中胡思亂想嘅程度，統統都係暗戀人嘅反應!

冇可能架！

我點會對Miss有非分之想呢！做功課先！唔好亂諗嘢！唔識做就查下Miss比我嘅筆記⋯⋯頂！連筆記都令我諗起佢！理性與感性不斷角力！好辛苦啊！！





做到咁上下，我唔想再比份筆記影響我！索性亂鳩咁做！當我做晒份工作紙後，我即刻返去課室交功課。一踏出B班房門時，就發現周Sir喺我班門外古古怪怪咁。佢扮晒巡樓，實際想偷睇入面嘅情況。我反而好奇Miss同Matthew 喺課室做緊啲咩，搞到周Sir好焦急咁。

咦⋯⋯我⋯⋯我內心竟然緊張起嚟？Matthew師兄同Miss孤男寡女⋯⋯痴線！唉！死就死啦，起碼唔似得周Sir咁閃縮！

我一上前，好自然會同周Sir互啤。但周Sir好似被我發現佢做緊虧心事而被我嚇咗一跳，然後再擺姿態。

「你過嚟做咩！」

「交功課囉！」





周Sir打量咗我一眼後，就自己走咗。可能我埋嚟比佢兇一下，佢當係一個落台階自然離去。不過佢走嗰時我見到佢塊面黑過包公！

周Sir走咗之後，我就望下班入面嘅情況——好正常咋喎！Miss坐喺老師位度，Matthew師兄就企喺度做個人演講。

「⋯⋯孟子嘅《論四端》提到，人之所以為人，係因為人有惻隱之心⋯⋯」

Matthew師兄把聲好磁性，十足DJ咁。睇佢明星嘅外表，談吐同神態都相當有自信同魅力。又難怪Miss聽到兩手托腮，十足十個小迷妹咁欣賞自己偶像。

Miss會仰慕自己學生？我估應該係Matthew師兄呢刻嘅表現吸引到Miss。





此時Miss感覺到有人嚟咗，佢向門口望嚟，就叫停咗Matthew師兄，然後佢慢慢行嚟。

「做晒啦？」Miss開咗門，接過我份嘢求其望兩眼就話：「嗯，算你啦! 我忙緊呀，之後再同你傾下呢份工作紙！」

Miss bye bye都冇講就想返埋位。呢個時候我叫停佢。佢回頭一望就話：「想問功課？咁你要等我練完Oral先喎！」

「唔⋯⋯唔係呀。」頂呀！我幾時開始對Miss會怕羞成咁，氣勢呢！氣勢喺邊呀喂！

「呢份筆記係⋯⋯」我舉起份筆記。

Miss ：「係啊！特登整比你架！星期六日溫咗佢，下星期一我會問你書。忙緊，係咁先。」

「嗯⋯⋯」

Miss好匆忙咁關上門，令我有一種被拒於門外嘅失落感。





吓⋯？！失落？

= = = =

傍晚六點半，操場。

「阿偉呢邊呢邊！傳波呀喂！」「屌你杰少睇路啦！」「Mark人啦死肥波！彈你Lin頭呀！」

B班輸比我之後，放學搵我地復桌，仲要打全場添。

「做咩呀你！狀態好好咁喎！」阿偉不禁讚下我。

「Happy Friday呀撚樣！」





呢一刻嘅我心情太複雜，我只係想不斷靠打波嚟分散下注意力。

搓咗幾下攻守之後，粒波被我射得太大力。一野就飛咗去停車場嗰邊。我地四兄弟一齊去執返粒波，正正因為咁，我地見到啲唔可以見到嘅嘢。

「⋯⋯哈哈，係呀?今晚咁人齊,實好好玩喇！」

我聽到Miss把聲由遠至近咁埋呢。因為粒波跌咗落草叢關係，我地四兄弟匿晒入草叢。

我輕輕撥開啲樹葉，望住兩個人影慢慢行去架車度。

係Miss同周Sir。

「我有幾個朋友都單身架，今晚靠你幫手啦。」

「佢地係咩人嚟架？我啲姊妹要求好高架喎。」





「放心喎。一定好人嚟先，好似我咁。」周Sir幫Miss開車門，然後口甜舌滑咁講：「阿盈，今晚除咗我之外，不如唔好比其他仔埋身呀？」

「你呀？哈。」Miss冷冷一笑，就上咗佢車。

周Sir搖一搖頭，就上車揸車走人。

我地四兄弟慢慢喺草叢伸返個頭上嚟。

「咦？Miss跟周Sir去酒吧玩喎！」杰少：「洗唔洗同Miss講聲先呀？」

「講咩呀？」阿波。

「周Sir有老婆仔女架嘛。」阿偉。





「如果Miss明知係有婦之夫都仲中個頭埋去，咁擺明做狐狸啦！」杰少。

「咁都得？！冇可能，Miss Wong咁靚，佢絕對唔會咁架！」阿波難以置信到講嘢都冇晒邏輯。

我愈聽就愈覺得個心唔舒服，於是我就話：「關我地咩事呀！打波啦！」

我都唔知自己想點。

我唔在乎Miss，佢私生活係點都唔關我事。

即使佢同Matthew 師兄有啲古怪。

即使佢收啲阿Sir做兵。

即使佢做狐狸精⋯⋯一切都唔關我事！

不過⋯⋯我⋯⋯點會覺得難過架？

.
.

原來，暗戀第一件教識我嘅事就係——若即若離嘅難過。

吓⋯⋯咪住先⋯⋯連我自己都忍唔住講係「暗戀」？

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #Miss故