真人真事改篇﹕師生戀﹕《最接近的陌生距離》: 第五章之二
Miss嘅魔法真係好犀利。從前星期六同日我只有玩或者返工。但今日我竟然有溫佢份筆記？！我真係唔知自己發生咩事？！
呢兩日我不斷記起佢，而個心就好似少咗舊嘢咁。好唔舒服，直至我望住Miss送比我嘅筆記時，就好似見到佢個人，心都定咗啲⋯⋯。
其實係因為我掛住佢⋯⋯唔得！冷靜啲呀謝子匡！
講到底Miss都係想方便管理4A班唧！擒賊先擒王，將我收服就等於收服晒成個A班嘛！
唔好中佢計唔好中佢計唔好中佢計唔好中佢計唔好——總之！星期一開始，我做返衰仔！咁所有嘢就一定會回復正常！
= = = =
今次連個天都幫我。星期一，老母一早起身返工，一切又回到唔理我嘅時候。咁大好嘅機會梗係順理成章走堂再返兼職啦。
當我聽住Miss嘅追魂call時，我知道所有嘢都回復緊
正常⋯⋯掛？係囉，點解我會覺得唔自在嘅？我驚會比Miss罰？唔係呀？咁到底係咩原因呢？
呢次我又冇返學三日，最後Miss又麻煩我老母篤我返學。一大清早，Miss已經喺學校門口等緊我同我阿媽。
「子匡媽咪，我係班主任Miss Wong呀。你而家有冇時間傾兩句？」
「哎吔老師！唔好意思，我要趕時間呀！」
「阿匡問題好嚴重，同埋佢校服方面⋯⋯」
「老師對唔住！我遲到啦！下次呀，下次再傾。」
「咁⋯⋯我再約你啦。」
老母走咗之後，Miss望住我，我只能露出無奈嘅表情。
Miss隱隱咁嘆一口氣，我見到佢好似想講一啲關心嘅說話，但佢好快變返嚴肅同冷淡表情，對住我講：「上星期你話過唔再逃學架喎！」
換係以前我一定會駁佢嘴，但而家對住佢，我竟然惡唔起？而且而家內心嗰種感覺同我決定再逃學嗰一刻係一模一樣架！特別我見到Miss呢刻嬲到忍住忍住咁嘅樣，內心嘅感覺就更強烈！
呢份感覺到底係⋯⋯
「跟我嚟。」
「你想帶我去見周Sir呀？」
Miss行咗兩步，就回頭啤咗我一眼，佢冇講啲咩就繼續帶我行。我都知架啦，冇返學三日咁大件事，佢十成九搵周Sir嚟招呼我啦。點知⋯⋯
「呢度係呢三日嘅功課！」Miss將中文功課推喺我面前。
最終Miss帶我去到教員室外面，我坐咗喺專係罰同學補做功課嘅位度。呢一刻我呆咗，點解佢⋯⋯
「今日開始，小息、Lunch同放學，都要補做晒啲功課！你做晒所有功課後，我再同你計逃學呢條數！」然後佢眼尾都唔望我就走咗，我佢真係好嬲。嗰種嬲就好似因為係被人呃咗咁。總覺得我今次觸碰到Miss內心嘅事？
點解Miss唔係搵周Sir罰我嘅？逃學咁大件事，走唔甩架喎！小過呢？大過呢？我懷住呢啲疑問揭緊啲功課，最後發現有份筆記攝咗喺最底，又係Miss親手寫比我嘅課文精讀。
佢唔係鬧我先、唔係罰我先，而係要我做功課先⋯⋯點解嘅？Miss對我嘅好，唔係只係為咗方便佢管理課室咩？
我以為我逃學，所有嘢都會正常晒。但原來唔係！或者我要再做盡啲！要再衰啲先得！
= = = =
「brother!」
三枝維他奶互碰，但歡樂嘅氣氛因為我冇撞杯而冷卻落嚟。
「匡哥！」杰少好驚訝我竟然冇做呢個指定動作。
「係！bro⋯⋯brother!」我吃驚一下，舉樽補做返。
「搞咩呀匡哥，神不守舍咁喎。」肥波
「冇⋯⋯冇事。」我吉咗粒魚蛋食，瞄咗阿偉一眼。見佢對我露出一個意味深長嘅微笑，我皺眉問佢：「咩呀？」
「你近排冇錢呀？」阿偉問咗句令我不解嘅問題。
「唔係呀。」
「哦！」佢陰陰嘴笑，飲咗啖維他奶又講：「原來因為女。」
「你講咩呀？」我。
「男人唔係煩錢就煩女人架啦。」阿偉瞇起眼笑，好似成隻狐狸咁。呢條友仔好似睇穿咗我啲嘢咁⋯⋯頂呀！領咗佢嘢！
「喂！匡哥你鍾意人咩？」杰少。
「吓？係隔離女校？！」阿波個樣好真心。
突然之間要面對三個人嘅突襲，嚇到我反應唔嚟！
「乜撚嘢呀屌！冇呀！」
「我知啦⋯⋯」阿偉笑瞇瞇咁托頭，佢話：「Miss Wong呀嘛！」
「吓？！」阿波嘛到就嚟暈低。
「你鍾意Miss呀？！」杰少一面恥笑：「4A班大佬喎？哈⋯⋯哈⋯⋯」
阿偉！大佬！放過我呀！！
「喂⋯⋯唔好亂講啦⋯⋯邊⋯⋯邊有⋯⋯！」我嚇到支吾以對！咁梗係啦，無啦啦比人睇穿我心諗緊咩⋯⋯咪住先！痴線架！我諗緊咩架？我冇呀！我冇鍾意Miss!！
阿偉好似好開心見到我而家呢個食咗屎嘅樣，笑咗幾聲後又講：「你兩個諗咗去邊呀？匡哥被Miss追殺緊啲功課嘛！」阿偉望住我，好似將粒波交比我。
「係⋯⋯係囉！我又冇返學，又唔交功課。梗係驚佢啦！」我連忙食多粒燒賣，想成個人自然啲：「咁⋯⋯Miss罰我冇小息嘛。而家我偷走出嚟要一眼關七𥄫佢喺咪度架！」
阿偉繼續笑嘻嘻。
「啊！咁又係呀！匡哥聽Miss話先唔正常喎！」阿波嘅真心終於有用啦！
「咪臭係！」我。
氣氛好快緩和起嚟，我鬆一口氣。不過⋯⋯其實我驚乜呀？
呢個時候杰少又話：「講開Miss Wong, 細佬我最近收到啲風喎！」佢又露出招牌惡作劇奸笑。
阿偉同阿波挨近少少，杰少扮下四圍望，再鬼鬼祟祟咁講：「Miss Wong同周Sir有嘢就係人都知啦。」
「係呀係呀！」阿波點頭，講得好大聲。
「妖！」阿偉兜嘢拍落阿波個頭。
「除咗周Sir，都傳緊其他阿Sir同Miss有嘢，呢個大家都知啦。最近Miss Wong之所以上位上得咁快⋯⋯」
聽杰少講，喺我冇返學時，學校出現咗啲人事變動。Miss而家做緊一啲容易搏到表現嘅位。除咗跟SEN外，仲做埋低年級訓導老師。同時佢又係課外活動老師，要幫手跟下中文辯論隊。如果Miss訓練到中辯隊拎到獎，真係一個搏到表現嘅機會。
「睇電視都有講啦，女人要上位好簡單之嘛。就係同上司上⋯⋯」
杰少同阿偉好有默契咁想用唇形「讀」出某一隻字。但係阿波就——
「床！」
仲要好撚大聲！
「頂你個死肥仔！」 「真嘅嘢唔好咁大聲呀！」阿偉同杰少對阿波粒Lin頭展開猛烈攻擊！
呢個時候，我眉頭皺一皺，手腳開始漸漸凍起嚟。我見住佢地傾得好興奮，而我唔知點解融入唔到佢地，好想快啲走！
「唔止阿Sir飲晒迷湯添啦。」杰少繼續講：「學生都比佢迷晒啦！」
「我呀我呀係我呀！」阿波又突個龜頭出嚟。
「收嗲啦！」阿偉拍柒阿波。
「嗱老實講，Miss係嚴啲，但算好錫我地班嘅。我地班個個都鍾意佢。但係有一個人對Miss嘅感覺就同我地完全唔同嘅！」杰少。
我聽完之後，我感覺到面部肌肉有啲唔自然，心諗⋯⋯佢唔係講緊我下話？⋯⋯喂！我又亂諗嘢？
「就係中七嗰個Matthew 師兄啦！」佢地即時起哄。
「我都收到啲風喎！呢排佢地成日一齊走呀！」阿偉。
「唔只啦，呢排差唔多留完堂，Matthew師兄都會嚟我地班嘅！然後佢地兩個喺課室做啲咩就冇人知啦。」杰少陰陰嘴笑：「練Oral喎？知唔知Oral咩意思呀？」杰少做咗個口交嘅動作。
「喂！」我叫得好大聲：「人地真係正經練中文Oral架。咪亂傳啦！Miss都係後生啲同靚啲唧，唔代表佢係仔都姣架嘛！你班仆街識唔識尊重架？！」
鬧完之後佢地三個呆咗咁望住我。連我自己都好驚訝我竟然會講呢啲！好煩！好亂！我要靜一靜先！
呢個時候——
「班長！」Miss喺遠處叫緊我。
「哇！我屌！！殺到埋嚟！我走先啦！」
我急急腳咁走，時間真係夾得好。借避開Miss嚟離開呢個令我心煩嘅環境。
= = = =
IG﹕ar_hong_91
#小說 #文字 #文學 #愛情 #故事 #師生戀 #講故佬#小甜 #Miss故