真人真事改篇﹕師生戀﹕《最接近的陌生距離》: 第六章之二

小息。

之前因為逃學、遲到、冇交功課等等嘅違規問題，終於到咗找數嘅一日。啲老師排晒隊咁招呼我，搞到我打唔響如意算盤。我本來想喺教員室外嘅位補做返中文功課比Miss。但我咁樣比人輪大米法，輪得嚟都冇咗小息。期間Miss喺我旁邊經過，但佢依然一眼都唔望我。

最後因為我違規得太嚴重，應該會醒個大過比我嘆。儲夠三個大過我就bye bye。唉⋯⋯呢次真係戇鳩鳩咁斷送自己前途。而且個理由真係好撚戇鳩。

= = = =

午息。





課室入面，我同阿偉佢地圍埋食飯。當然呢個又係收風嘅時間。

「呢次不妙啦。」杰少口講不妙，但個樣擺明派花生咁款：「應該冇咩人會憎Miss Wong架可？」

「咪匡哥囉！」阿偉奸笑，我刻意唔比反應佢。

「Miss Wong咁好人又靚。簡直人見人愛啦。」阿波一面食咗春藥咁，似乎佢同我一樣都鍾意咗Miss。

老實講，雖然我返得少，但都感受到Miss教學嘅認真同熱誠，應嚴則嚴，應溫柔就溫柔。全班同學都已經被佢收服得七七八八。





「咁有咩咁不妙呀？」我有少少擔心咁講。

「有冇留意點解而家係黎Sir管緊我地食飯呀？」杰少講完，我地先知黎Sir呢個Nobody嚟咗。

「Miss被副校長召見咗嘛。」杰少：「應該大鑊嘢啦。」

「吓⋯⋯佢⋯⋯咩事呀？」我強裝冷靜，內心其實驚咗下。

「嘩，好多單喎。邊單先？」杰少故弄玄虛咁講：「就講最大鑊嗰單先啦。佢同Matthew師兄啲嘢應該傳到去副校度。」





我嚇到跌一跌叉，續道：「佢地練Oral咋喎！」

「你點收到風架？」

「嗱！第一！」杰少一面得意咁講：「呢單嘢牽涉到全校最叻嘅Matthew師兄，好難唔傳出嚟囉。第二，佢地啲嘢傳得出嚟嘅，多數唔會係生安白造啦！邊有人知佢地係咪真係練oral唧。佢地太close又係事實喎！你諗下Matthew師兄曾經因病休學幾年，佢今年21歲啦，Miss都係大佢兩年唧。佢地會拍拖一啲都唔出奇呀。」

唔通佢地真係拍緊拖？

「最近Miss同周Sir傳分咗手，唔通因為Matthew？」阿波幫我問咗我心入面嘅問題出嚟。

「呵呵⋯⋯呢單就複雜啦。」杰少：「可能關Matthew事，又可能唔關。因為⋯⋯」

杰少又故作神秘咁叫我地坐埋啲。佢鬼鬼祟祟咁講：「佢地分手最大原因係，Miss被周Sir呃感情！傳因為有其他老師忍唔住同Miss講周Sir其實有老婆架！」

我同阿偉、阿波眼都突埋。





「我前日睇住Miss同周Sir嗌交嘅！喺停車場趁冇人嗰時嘈之嘛。」杰少個樣好有成功感：「Miss話好憎人呃佢，叫周Sir唔好埋嚟之類。」

咁難怪琴日Miss嚟訓導室嗰時個樣咁黑啦。而周Sir亦都將被Miss飛呢啲嘢歸咎落Matthew師兄度！嘩！咁成件事就通晒啦！

「總之Miss呢次就大鑊啦。無啦啦介入周Sir婚姻都算，仲爆單師生戀出嚟。睇怕我地會轉班主任喇。」

杰少爆完料就轉另一個話題，佢地三個若無其事食飯。只有我已經冇晒胃口。

Miss可能會走。而且原來呢排佢咁多嘢煩，我仲要做衰仔比麻煩佢。我真係太差勁⋯⋯

= = = = 

IG: ar_hong_91





#小說 #文字 #文學 #愛情 #故事 #師生戀 #講故佬#小甜 #miss故