真人真事改篇﹕師生戀﹕《最接近的陌生距離》: 第六章之一

最後一堂，最後五分鐘。

下午嘅陽光慚慚變成橘黃色，由窗外照入。

「⋯⋯記得聽日要交班會費呀。」Miss臨放學前變得寬容，笑容都親切：「主席，請你答我每人要收幾多錢？」

「$40！」課室一角嘅一位男仔講。

由於我一直都冇返學，Miss一早就搵咗第二個人做班會主席。





「冇錯啦！」Miss讚賞咁講，呢個時候下課嘅鐘聲響起咗，Miss就話：「Goodbye Class!」

「Goodbye and Thank You Miss Wong!」全班企起身講，只有我戇居居咁四圍望唔知咩事。

Miss離開課室，感覺佢當咗我透明。我見住啲同學魚貫離去，就覺得奇怪，於是叫停咗準備走嘅阿偉：「偉哥，唔係要留堂補課咩？」

「教晒未唔洗補囉！」阿偉轉住個籃球咁講。

「你冇返嗰幾日Miss教晒書啦！」杰少喺旁邊恥笑。





聽杰少講，Miss好似因為同隔離班老師鬥緊表現，於是開猛火力補課，所以同班同學嘅進度真係比我快好多！

我唔係擔心跟唔跟得切學習進度嘅問題。我只係想留堂咋！唉⋯⋯我真係痴咗線，我咁大個仔第一次咁想留堂！於是我向阿偉打聽，原來Miss今日要罰啲中一仔留堂，於是我喺佢地走咗去打波之後，就嗱嗱聲去中一嘅班房。

= = = =

唔知係咪啲中一仔太跩定係Miss被我激到心情勁差。我一去到中一嗰層，就聽到啲中一仔被Miss片到喊晒嘅聲音。然後我行到1B班課室門前，就見到一片令人慘不忍睹嘅慘況。

Miss嘅氣場太勁，搞到我唔敢行入去。直至佢望咗課室門口一眼，我先戰戰兢兢咁敲門，同Miss打咗個招呼。但Miss繼續片人，冇叫我走又冇叫我入嚟。所以我只好硬住頭皮入去，揀最後嘅位置坐。





Miss根本當我透明，佢繼續教訓班中一師弟。老實講，我真唔知可以做啲咩。只係拎今日啲中文功課嚟做。唉⋯⋯原來一早教完《始得山西宴遊記》，我一題都唔識呀。

喺我苦惱緊份中文功課點做時，有個中七師兄神色凝重咁走咗入嚟。嗰位師兄就係Matthew師兄嘅同學。只見佢急忙咗咁行去Miss度，喺佢耳邊細細講咗一句說話，Miss本來嘅怒容就突然憂心起嚟，講咗句：「佢下午早退咗？」

師兄點頭。Miss續道：「你地要好好睇住Matthew呀。」Miss同師兄細細聲傾咗幾號句後，師兄就離開。而Miss充滿愁緒沉默咗陣，然後先再教訓中一師弟。

嗯⋯⋯睇見Miss咁牽掛Matthew師兄，佢地關係應該好密切。難道真係⋯⋯男女朋友？

由於唔識做功課，加上個人唔夠瞓，最後我慢慢被睡魔召喚咗。

當我醒返嘅時候，課室已經空無一人，太陽都快落山。吓？到底係幾時完咗留堂架？冇人叫我起身嘅？即係話Miss係完全冇理過我？！

唉⋯⋯佢真係講得出做得到。一般女仔就話易氹唧，但我鍾意嘅對象係我老師呀⋯⋯唉，冇攻略，點打呀？

= = = = 





IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #校園