真人真事改篇﹕師生戀﹕《最接近的陌生距離》: 第八章之三
Miss坐喺床邊，用風筒吹緊頭。佢將平時扎開嘅公主頭拆開左，迷人嘅秀髮撥埋一邊。佢一邊吹頭，一邊皺晒眉頭，心情唔多好。Miss嘅耳仔、頸同鎖骨加埋嘅組合係最靚同最有魅力嘅地方。加埋佢面上煩厭、嬲嬲地嘅表情，反而更吸引！
然後我目光由佢個樣移去佢對長腿度！佢除咗對高踭鞋，赤住腳咁翹起咗。佢對腳真係好白，腳掌同腳趾白裡透紅咁。佢嘅腳趾塗上粉紅色嘅甲油，令佢對腳望落真係又白又靚。更令本來女王屬性嘅佢，有種少女可愛嘅反差。由於張床算係幾高，佢翹起嘅腳吊住晒，仲輕輕咁搖住，真係好誘人呀！
最正知唔知係咩？就係今日Miss唔係著平時嘅suit，即係好表現到佢屁股美態嗰件。 而係一條黑色開叉長裙！所以佢翹起嘅腳係露埋雪白嘅大髀呀！嘩！好痴線呀！明明呢身打扮係最正經、最端莊！但點解Miss無論佢點坐都好，都會有一種令人心癢難耐嘅性感嘅？！佢真係好無敵，簡直係被老師呢個職業耽誤咗嘅model呀！
「班長？」Miss意會到我嚟咗，即時收起風筒。揚住頭髮咁講：「你⋯⋯做咩嚟咗呢度嘅？」
「我今朝早返嚟開門。然後我走廊見到你好狼狽咁入校門。」我：「天氣涼咗，你又淋濕晒。睇下有咩可以幫到手囉。」
Miss無奈咁笑，見我雙手擺喺後面，就話：「你收埋咗啲咩？」佢諗咗一陣，就反晒白眼講：「唔係吓嘛？你買咗熱朱？咖啡定鮮奶呀？」佢唔止無奈直頭有啲驚添！
果然冇估錯啊！買熱飲係必死！
我好自豪咁笑，喺環保袋度拎咗條快乾毛巾出嚟：「熱咩飲呀！毛巾實際啲喎！」
Miss雙眼發亮，高冷女王又難得展現笑容：「你點解會有嘅？」佢急不及待咁接過毛巾。
我鬆一鬆肩，一面唔在乎咁，但係心入面暗爽到不得了。我話：「吳姑娘成日帶我同阿偉佢地去露營嘛！呢啲係上次露營嘅物資呢架。」
「吓？有冇用過架！」
「全新架！」
「哈⋯⋯算你啦！」
「除咗呢樣，我仲有呢啲。」
Miss放低條毛巾望下我仲有咩法寶。
「嗱！你睇下有冇需要換咗件衫佢啦？」我拎咗件全新活動Tee出嚟。
Miss拎起件tee，皺晒眉：「『共創成長路』？你以前玩Path架？」
「唉！唔好提。」我再拎件法寶出嚟：「拖鞋，睇你對鞋都濕晒架啦！」
「我未必用得著啦！校長唔比老師著露趾鞋架。」
「傻架佢？落狗屎濕晒都冇得酌情？咁你喺自己位著囉。」於是我又搵件法寶出嚟，話：「都唔緊要！嗱！我仲有呢樣！」
「備長碳？！」
「放喺鞋入面吸濕一流！」
我Show晒三件法寶後，我見到Miss一面感激，同頭先我剛入嚟嘅樣好唔同。佢知道我同嗰三件剩係比熱飲嘅柒頭係唔一樣。我唔係嚟獻殷勤，反而真係想幫佢。真係鍾意人，咁梗係真心想幫人啦，點會借機會刷存在感架？
「估你唔到喎！班長！」Miss讚賞，佢又有少少驚訝，繼續用毛巾擦乾頭髮：「你成日逃學、唔交功課又遲到，但其實都好願意幫人呀。」
「哦⋯⋯係咩？哈哈⋯⋯」被鐘意嘅女仔讚，即刻唔識反應！
「其實睇你同同學關係咁好，都知你人品唔差嘅。係差嗰少少唧。」Miss比出尾指講
「嗯。」
Miss：「以後比心機讀書啦！好唔好？」
「嗯！」我點頭：「咁我可唔可以繼續比你罰留堂呀？順便留低問你功課嘛。」
Miss皺一皺眉，然後笑住講：「其實真係唔洗喇。你逃學同食煙件事已經記咗大過啦。」
提返起我做衰仔嗰陣時，我內心即刻內疚起嚟。然後我按奈唔住講咗一聲：「Miss Wong! 對唔住！」講出嚟之後成個人舒服晒！
只係Miss有啲錯愕，預料唔到我會為呢件事道歉。
「其實我想同你講好耐⋯⋯我知道嗰段時間你好多嘢煩。我又唔乖，激到你好嬲。Miss 對唔住。」我停一停，內心有一股衝動想衝出嚟，就話：「我⋯⋯好驚你真係以後都唔理我。」
吓⋯⋯⋯！我講咗咩呀！屌，呢次鬼拍後尾枕添！講完我唔只自己都驚，Miss都呆咗一下！
「咁⋯⋯你唔理我，就冇其他老師關心我架啦。」反正都講咗心入面嗰句，唔差在啦！
「Sorry。」Miss柔聲咁講。
「吓？」
「Sorry, 我唔應該咁樣鬧你。嗰時我有好多個人情緒，我嗰時⋯⋯⋯唉，好唔專業添！」Miss欲言又止咁，我知佢想同我解釋返當時係因為Matthew師兄嘅事影響到佢情緒。
「嗯⋯⋯」我點一點頭。
「咁你以後唔好再激我啦！知唔知！」Miss微笑，前所未有咁親切。
「知道！」我點會再敢去激嬲你呀！可以的話，我會盡力令你開心添！我繼續話：「咁我繼續比你罰留堂喇喎！」
「低B仔。」Miss反一反白眼，苦笑咁講：「你鍾意點就點啦！」
Miss望一望手錶，就歎咗口氣：「就上堂啦！我要早啲上去呀！」
「你未乾得晒喎！搞埋先啦！」
「唔得呀。要早少少返課室搞班務。」
「有咩班務要搞呀？我幫唔幫到手架？」
「啊！」Miss恍然大悟咁叫咗聲，佢話：「係喎！你可以幫手收回條先喎！啊⋯⋯仲有！」然後佢拎部電話show咗個名單嚟，佢繼續講：「佢地五個仲未交班會費！你一陣幫我追⋯⋯咪住先！」佢記起一啲嘢，皺晒眉頭咁問我：「你好似都未交喎！」
「啊！⋯⋯哈哈哈！」東窗事發，我只能傻笑：「得啦！收回條同埋追班會費嘛！」
Miss秒黑面，向我攤大手板：「拎嚟！」
「拎咩呀？」
「班！會！費！」
「Miss, 放過我啦！」
「而家！快！」
「我呢個星期得一舊水咋！」我喺褲袋潛左張一百蚊出嚟。
說時遲 那時快，Miss已經一手搶走張一百蚊！我大叫：「抓錢呀喂！」
「返課室做嘢！」Miss秒變返女王mode。但今次開玩笑意味比較重。
雖然比Miss屈咗一舊水， 但唔知點解我笑得好滿足。可能因為我感覺到我同Miss之間開始有啲啲唔同吧？
= = = =
IG: ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學