真人真事改篇﹕師生戀﹕《最接近的陌生距離》: 第二十三章之四

Miss有返學的話，成個世界就唔同晒。起碼有返少少色彩，而我嘅努力亦變得有返意義。

由第一堂開始，我就不斷做返之前欠落嘅功課，一本追一本。我好想一陣小息時就比Miss見到我即使分左手，我都冇自暴自棄。我更奢望嘅係佢會因為咁而回心轉意。當我有呢個個目標之後，我就更努力去還清啲功課債。有趣嘅係，我竟然忘記左分手嘅傷痛。

鈴————！

我期待嘅小息鐘聲。

我得到黎Sir批准休息後，就拎住欠落Miss嘅功課去返班房搵佢。我手上嘅功課只係清到上星期，而且只係Miss教嗰科，條路仲係好漫長。





喺我以半跑半走嘅步速行上樓梯時，我冷不防比人個黑影由左邊攝入黎。然後我心口痛左一下，一股強大嘅衝力就將我推左落地。

噗——！我只覺得眼前一亂後，個屎忽好痛。原來我成個人跌左落地下。我想執返啲功課時，被一隻皮鞋踩住左，然後聽到「嘿⋯⋯嘿⋯⋯」嘅笑聲。

我抬起頭，咬牙切齒講：「肥 B!」原來係佢推我落樓梯！

「叫肥B哥啊！」

佢都未講完，佢嗰兩個跟班就喺佢身後走出黎，將我扶起再捉實。





「上次當我沙包呀嗱！」

嘭——！一拳打肚！

「嗚——！」我有一下痛到抖唔到氣。

「反轉佢！」

然後佢啲跟班就將我個背脊對住佢。





「我話過會覆你卓架！」

嘭——！背脊極痛！

喺劇痛之時，佢啲跟班將我對返住肥B。肥B捉住我下巴，笑住咁講：「上次好巴閉架喎！為左條女打我？！」

我敢怒不敢言。

「做乖仔？我等緊你還手呀！」

再一拳打肚。

我痛到成個人都企唔直！

我雖然好嬲，但唔可以還手！一還手就白廢！唔可以衝動！我只能夠繼續怒目而視！





肥B好欣賞咁笑，話：「忍得住喎！」然後佢面目又變，語帶挑釁咁講：「你想唔想知你條女同周Sir嘅真正關係係點呀？」

佢又想⋯⋯侮辱Miss?!

內心嘅衝動、怒火，就好似一隻被籠困住嘅猛獸，喺度不斷撞擊鐵籠！

但有一把聲音就即時馴服咗我內心隻猛獸。

「你地喺度做咩——！」

溫柔又嚴厲嘅聲音，我個救星，Miss。

「佢碌落樓梯咋，我地好心扶起佢唧！」肥B狡辯。





Miss慢慢喺上層行落黎，厲聲說道：「你哋係咪打佢！」

「喂！Miss你望清楚！」肥B捉實我個樣，再擰去Miss度，大放厥詞：「佢仲青靚白淨架！邊有打佢呀！」

我明白左佢頭先剩係打我肚嘅原因！

「即刻放開佢！」Miss已經行左落黎，同肥B對峙。

「好呀！Miss叫到實聽你話。」肥B示意佢嗰兩個跟班就放開咗我。

喺肥B走之前，再回頭同我講咗聲：「啱啱開始咋！」

肥B走左之後，我拾返起啲功課。而Miss亦都行咗埋嚟，問我：「同學你有冇事？」

Miss慰問我，係好事。但⋯⋯點解我覺得好似有啲怪嘅？





「洗唔洗去醫療室？」Miss同我企開約有兩身位距離。

Miss依然對笑面迎人，但係有一種距離感。我⋯⋯我唔識去形容呢一刻係咩感覺。就好似面前嘅人仍然係佢，但入面嘅靈魂已經再唔係Miss。我而家成個人呆晒，剩係拎住啲功課，咩說話都講唔到。

「交比我嘅？」Miss上前嚟拎左我疊功課，佢隨意拎起一本揭左幾下，就話：「做就做晒，但係啲字仲係好似打風咁呀！啲字再咁核突呢，我就要你重做架啦！」一如以往咁嚴肅⋯⋯

我望住佢檢查我功課嘅樣，正正係我最喜歡見到嘅側面。令我回憶起我地偎依嘅時候，我用手將佢啲頭髮圈喺耳背時嗰個令我心動嘅樣貌。佢散發出嘅嗰種美麗動人氣息同以前係一樣，只係⋯⋯多咗份陌生。

除左陌生，仲要係一種好強烈嘅師生距離。

最接近的陌生距離。

「做得好。」Miss滿意咁點下頭：「不過你仲差其他科嘅功課。你真係要慢慢追返晒佢啦。Miss要巡樓啦，冇特別事就係咁先啦！」





Miss拎住我啲功課想走，我即刻叫停佢：「阿盈！」

我竟然不自覺地喺學校裡面叫左佢個名。

Miss望返過黎，有啲嬲咁講：「班長，唔可以直接叫老師個名，咁樣好無禮貌架！要叫Miss Wong，或者黃老師。」

我覺得⋯⋯心入面嘅窿好以比呢句同矛一樣嘅說話整大左。啲寒風不斷咁吹入黎。

佢叫返我做「班長」⋯⋯

「Sorry⋯⋯」

「係咪有嘢想問？」

「Miss,我⋯⋯」我好努力咁強顏歡笑：「我頭先好努力咁忍耐。我有聽你話，我冇再衝動！」我期待嘅唔係一般嘅讚賞。

我仲爭取緊！仲爭取緊⋯⋯

Miss微笑：「嗯，我見到啊！你做得好好！」

咩話？呢樣嘢唔係你所期待架咩？

講完之後，Miss就想走，我再叫停佢：「仲有啊！Miss，我承認過你嘅嘢，無論點我都會做好佢。啲功課我一定會清晒，唔係係剩係你嗰科。係每一科我都要做好佢！」

Miss聽完之後，冇即時回應我。好似諗緊啲嘢，而我內心就不斷咁納喊，好想佢下一秒變返做我熟悉嘅Miss。

就喺下一秒！Miss變返我嘅女朋女叫我一聲：「低B仔！你做得好好呀！」

但係⋯⋯

.
「嗯！」Miss點頭，笑住咁講：「咁你繼續努力啦！」
.

呢次佢真係走，我冇再叫停佢。

剛才發生嘅一切，我完全招架唔住，身體嘅傷已經唔再痛。惟一令我仲感受到嘅感覺，就係個心係慢慢、慢慢咁裂關崩落嘅感覺。

我終於意會到，原來呢個世上係有一種痛，叫做——

.
.
.

你把我當成了平凡人。

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師