真人真事改篇﹕師生戀﹕《最接近的陌生距離》: 第二十四章之一
也許，我今日先知道咩叫失戀。
琴日都仲可以自己呃自己，覺得Miss只係一時想唔開，比啲時間佢可能佢會回心轉意。但喺剛剛同Miss交流中，我知道一切都成定局。
Miss決心同我分手。
我寧願佢當我冇到、當唔識我。但佢今日將我變成一般師生關係咁，就好似將過去兩星期我地所經歷嘅嘢當冇發生過咁。感覺好似佢狠狠地話比你聽：「夢黎架咋！」⋯⋯呢份痛先最傷人。
我係有感覺架。
難道⋯⋯你冇感覺架咩？
= = = =
當我意識過來時，我又喺「臭格」度呆坐。 我低頭見到本來決心今日要清理嘅功課仍然原封不動，上面濕咗少少，應該係比我啲眼淚搞到濕咗。
「⋯⋯周Sir你咁樣做太唔正確啦！」
喺我想好好靜一靜時，我聽隔離會議室有人嗌交，而且係黎Sir把聲。
「⋯⋯身為老師你一定要客觀持平！你唔可以咁樣針對學生﹗總之中三嗰三個同學我都要記過，唔到你批唔批准﹗仲有，我頭先罰緊佢地三個，你唔可以放走佢地﹗阿匡到今日仲隔離緊架﹗始作俑者竟然消遙法外﹗」
黎Sir講緊嘅應該係肥B佢地。 似乎黎Sir應該同周Sir因為前日我同肥B打交嘅事而嗌交。聽得出黎Sir好嬲，我都未聽過佢講嘢咁嬲。
「⋯⋯你要罰嗰三個同學。我都要阿匡落鑊。打交就係打交，就要記過﹗」
可以想像到周Sir而家個撚款係幾咁令人想中 柒佢。
「你唔好唔記得﹗副校長已經批准我處理呢件事﹗你再咁落去，成個訓導組會冇晒威嚴，我地學校更加難去教導有問題嘅學生！」
「你亦都唔好忘記，我係訓導主任，我有最後決定權。就算你要記肥B嗰三個同學，我都可以同你慢慢拖，除非一係你連阿匡都記埋過。如果唔係冇得傾。」
「你呢個人簡直不知所謂！身為成年人竟然同個學生計較？你唔係應該首先考慮點教好佢地架咩？你係老師呀﹗你嘅職業唔係係比你去任意向弱者展示自己權力﹗」
「你講完啦嘛？我仲要去上堂。」
我聽到啲拉櫈聲，應該係周Sir想走人。
「你企喺度。你針對還針對，唔好拉埋Miss Wong落水！」
Miss? 發生左咩事？咁我要小心聽清楚！
「我唔係好明你想講咩喎。」
「嗰三個同學不斷傳緊你同Miss Wong嘅事。我知係你教佢地咁做！你咁樣會害到Miss Wong冇得喺教育界立足架﹗」
周Sir同Miss Wong嘅事？即係咩事？唔通琴晚我喺時鐘酒店見到嘅⋯⋯
我⋯⋯我就黎唔得⋯⋯我又抖唔到氣⋯⋯抖唔到氣⋯⋯
「哈⋯⋯係咁先啦﹗」
周Sir理都唔理黎Sir就走左。我聽到佢啲腳步好輕快，聽得出係一個勝利者嘅步姿。然後我聽到一下敲門聲，「臭格」嘅門打開左，周Sir嬉皮笑臉咁企喺門外。
我唔知自己而家個樣有幾難睇，有幾咁似喪家狗。但我知道，我而家呢個樣睇到周Sir好滿足同開心。
「唉⋯⋯」周Sir笑住咁嘆氣⋯⋯仆 街﹗佢真係好討厭，佢個樣擺明就話我知佢有幾開心見到我而家呢個樣！
佢唔講多餘嘅事，只係好下流地做左一下好意義不明嘅抓下體動作。然後佢望出去教員室，好似特登比我聽到咁叫左聲﹕「Miss Wong，想同你傾啲嘢。」
Miss？呢個時間，佢⋯⋯
「唔得閒？一句唧。為咗匡仔，我建議嘅事，你考慮成點？我知你識諗嘅，今晚見啦﹗」然後周Sir望返入「臭格」佢展示出好下流嘅笑容，再對我輕輕抓一下下體後就離開。
我⋯⋯我好似明白左啲事情⋯⋯
琴晚⋯⋯
意識又迷糊，就好似上星期三去出搵Miss咁，我同呢個世界慢慢剝離⋯⋯
⋯⋯
⋯⋯⋯
⋯⋯⋯⋯⋯
⋯⋯⋯⋯⋯⋯⋯⋯
「阿匡﹗阿匡﹗」黎Sir嘅叫聲令我返黎現實。
我感覺到我雙眼好熱，面龐好濕，鼻子好酸。黎Sir嘅影像被我眼內嘅淚水化成一道道重影。
「你情緒好差﹗冇事嘛？我叫左你成分鐘你而家先認到我﹗」黎Sir好擔心咁講﹕「我帶你去見吳姑娘好唔好？」
「社工？」
「係呀，你情緒好似唔多掂。」
「唔洗⋯⋯唔洗⋯⋯。黎Sir⋯⋯我抖唔到氣⋯⋯」
「我開返門先﹗」
「唔好，我唔想比人見到。」我控制唔到眼淚流出黎，我繼續講﹕「你⋯⋯你空堂？」
「係呀﹗」
「陪下我⋯⋯可唔可以陪我？」
「可以﹗我陪你﹗」
「好﹗多謝阿Sir⋯⋯」我嘗試吸大啖氣，話﹕「我⋯⋯我⋯⋯我知道晒⋯⋯」
「係呀，呢道隔音差。我都知我同周Sir傾嘅嘢你會聽到晒﹗」
「我⋯⋯我知道晒——唔—﹗唔—﹗」我忍住唔想大喊出黎。
「唔好擔心，我同你頂住﹗就算你要記過，我都會諗方法幫你將功補過﹗你唔會有事嘅﹗」
「我⋯⋯我知道晒——嗚—﹗唔—﹗」我就黎忍唔住⋯⋯
「總之我唔會比周Sir得呈﹗」
「我咩都知道晒啦！嗚——哇——﹗」
我趴左喺枱到放聲大喊。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師