真人真事改篇﹕師生戀﹕《最接近的陌生距離》: 第二十四章之五

黎Sir知我受咗唔少委屈，所以佢用訓導嘅權批准我肚餓時可以用教員室內嘅茶水間沖杯麵食。啲杯麵都係由黎Sir提供。真心，如果佢唔係煩膠，佢真係一個100分嘅老師。而家佢係值10分，首先煩膠扣10分，其餘80分都係因為佢係我情敵。

當我行去茶水間前，我聽到三把人聲喺茶水間細講大聲笑。有睇TVB都知，茶水間呢啲地方真係好唔適合講人是非。

「而家傳到成級中三都知啦。」

「雖然佢係高年級訓導，但有咩事上黎都唔分係咪高年級架啦！到時要佢幫手都管唔掂啲學生啦！」

「都唔知新校長點請人，請個工作能力咁低嘅人！生得後生同靚有咩用？」





明顯地，佢地係講緊Miss。

「佢唔係唔知周Sir有老婆架嘛？阿May之前提咗佢架！」

「好似話前晚佢地仲⋯⋯」

然後我聽到三把聲她壓低晒咁講，應該係圍埋聚頭咁傾。

可惡，我咩都聽唔到！





「唔係嘛？嗰啲地方？！」其中一條八婆好大聲咁講。

「佢嗰日下午請咗病假架喎！」

「早啲去開房啊嘛！」

呢一刻，我竟然不再吃驚，反而係個心隱隱作痛。

「唔止周Sir添啦。之前佢同某位中七學生都熟得滯，最後比副校長警告咗先收儉咗咋！」





「個學生最後都係比周Sir迫走咗添架！」

「唉！陰公，臨考A Level先被人迫走。周Sir同佢真係會搞衰呢間學校。」

講下講下，呢班三姑六婆都走咗。

呢一刻，我⋯⋯我⋯⋯我應唔應該再嬲Miss？原來佢每日都要面對呢啲流言蜚語！同我保持距離⋯⋯我好似明白咗miss的用意。

然後鐘聲響起，放 Lunch。 喺食Lunch之前，我想交晒部分欠嘅功課。今次我成績都唔差，拎上都有啲份量。 當我行出去走廊時，竟然同Miss迎面撞上。

「班長，你交功課？」Miss微笑。

班⋯⋯長？聽到呢度，我內心有一種莫名嘅不適。呢種不適好似火咁，慢慢由腹部燒出黎。

「係。」我。





「交比我嘅？」Miss。

我見佢行前一步，我卻退後一步，話：「今日冇做中文。所以係其他科。」

我同佢保持住最安全嘅距離。

「我幫你交比其他老師啦。」Miss上前想幫我拎住啲功課，釋出嘅善意比之前更多。

但係Miss呢個動作反而令我更痛苦。

「保持住⋯⋯距離。」我突然覺得呢句說話好難講，係咪我個心叫我唔好講？我再話：「咁樣就最好。係你⋯⋯係你講架！」

然後我唔理佢轉身就⋯⋯走？！





我做緊咩呀？！ 我個心好矛盾！明明頭先我喺茶水間聽到啲八婆咁樣講Miss後，我係明白咗Miss點解要同我分手！！但點解，當我見到佢愈係想釋出善意時，我內心嘅憤怒就走晒出黎！

我係咪傻咗？我竟然嬲Miss?我行得好快，好想離開Miss嘅範圍。直到我將功課交去科任老師嘅簿格時，我先感覺到自己慢慢正常返。

最後我打算去小賣部買枝嘢飲冷靜一下。當我行近去樓梯時⋯⋯

「咁啱呀匡哥！」

肥B同佢嘅跟班喺下層行緊上黎。

「撞鬼！」我細細聲咁講。

今個Lunch我唔洗旨意有啖安樂茶飯食⋯⋯唔係，食咗碗「兜鎚窩面」，真係咩都飽晒！

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師