真人真事改篇﹕師生戀﹕《最接近的陌生距離》: 第二十八章之四

「我啲嘢唔好講啦。食飯先啦！」阿偉望到我個紙袋就問：「咩嚟架？咁神秘嘅。」

我好得戚咁笑，好似賭神甩張底牌咁慢慢Show我盒愛心飯盒出嚟。

當佢地見到我個好有日系感覺嘅飯盒時，都表現得非常驚訝。特別係阿偉做出一個好欣慰嘅表情，佢好替我開心同幸福。

「匡哥，你條女整比你架？剩係個盒都好有心機喎！包晒便當布咁！」杰少好羨慕。

「梗係我女友整架啦。唔通伯母咩！」我一路講，一路好似拆禮物咁解開個便當布。





呢個時候我望去教師位嘅Miss, 見到佢停一停改簿，望咗過黎就甜甜地笑一下。

拆開便當布之後，我見到係一盒粉紅色嘅飯盒，洋溢住濃濃嘅愛意。我已經按唔住興奮，急不及待咁打開個蓋。就好似打開份神秘大獎咁，我地三個人都相當期待！

開！

⋯

⋯⋯





⋯⋯⋯⋯

⋯⋯⋯⋯⋯⋯

阿偉沉默。

杰少擦一擦隻眼想望真啲。

我笑容僵硬咗，好似想將時間凍結咗喺最幸福嘅一瞬間。





呢啲⋯⋯呢啲⋯⋯

呢啲係乜撚嘢嚟架！！！

你地知唔知人生最大嘅痛苦係咩？就係最幸福嘅一瞬間，事實突然擺喺眼前！！

呢一刻我好似跌到粉身碎骨咁⋯⋯我幻想中嘅Miss嘅手勢係好美好。個日式便當一定係好似動畫咁，入面嘅食物好精緻，起碼用日式魚蛋之類嘅嘢砌個Hello Kitty比我先啦！

但點解⋯⋯呢一埋紫色嘅嘔吐物，到底係咩一回事？！

「嘻⋯⋯」Miss好似發現唔到我面色有異，佢好期待咁對住我笑。根本就同我講緊：「快啲食啦！」

我望返阿偉，連智神都束手無策，做咗個哈利路亞嘅動作，預先為我默哀。

杰少喺驚嚇中回神，忍唔住想大叫：「哇！你女朋友⋯⋯」





「食嘢！」阿偉拍一拍杰少，

杰少係醒目仔所以識做，冇再講啲咩。阿偉又救咗我一命！

或者⋯⋯我嘗試形容一下我破碎咗嘅幸福到底係咩一回事。

我見到嘅係一堆泥狀嘅紫色物體，水份好充足，應該係因為叮緊時啲「倒汗水」流返入去。然後每一粒米飯都溝咗呢啲紫色泥狀物。呢一刻我好懷疑，亦都好似明白咗點解麥當勞吉祥物會得返麥當勞叔叔一個！

因為——

.

係Miss綁架咗滑嘟嘟啊！！





.

仲好殘忍將佢打成泥！混咗落啲飯度！

咦？旁邊一隻隻個啲係咩嚟⋯⋯屌！佢斬埋小飛飛對翼呀！！

呢一盒好殘忍嘅飯盒。

剎那間我明白，點解Miss會話我係第一個食佢整嘅午餐嘅男朋友。佢啲Ex應該領過一次嘢就叫佢以後都唔洗整Lunch比佢地！

Miss皺一下眉頭望住我，似係話：「仲唔食？」

偉神喺枱底輕輕伸咗我一腳，示意我：「食啦！想分手咩！」

Miss⋯⋯我應承你！我下次一定會準時交飯單！





張口一啖。我緊閉雙眼，細味Miss對我嘅愛。

好味⋯⋯好好味！好味到想好似《食神》個樣衰師傅大叫「好好味呀！」

但唔可以太做作。我憑我喺劇社嘅訓練，努力做出自然。記得劇社老師講過最難嘅戲唔係扮喊，而係想喊但喊唔出。 但我今日覺得最難嘅戲就係，明明好想嘔但要扮到好好食。

「嗯！」我對Miss感激一笑。

Miss羞澀咗咬咗一下唇，就繼續低頭改簿。

呢個時候，阿波終於返嚟。 成班同學知佢媾女就熱烈咁拍手。睇阿波食咗春藥咁，佢一定得咗米。佢一跑一跳嚟到我地個位。原本佢個樣好春風滿面，但見到我盒飯之後⋯⋯

「哇！中咗輻射咁喎！」





仆街仔！你又Team Kill 我!!

「😊」Miss。
= = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師