真人真事改篇﹕師生戀﹕《最接近的陌生距離》: 第二十八章之五

午息自由時間，「空中花園」。

「中咗輻射呀嘛！」Miss抱怨咁講，佢今次真係唔開心：「波仔講得咁大聲呀！聾嘅聽到啦！」

佢翹起雙手背住我，慢慢行去花圃前。

「盈盈呀⋯⋯」花園冇人，所以我可以咁叫佢：「唔好理佢點講啦。最重要係我食晒啦嘛！」

當時我知仆硬街，所以我嗱嗱聲食晒盒飯。





Miss擰返過嚟，一面生氣咁講：「唔洗勉強喎！難食唔洗食晒佢嘅。枉我⋯⋯琴晚仲⋯⋯」

其實都唔關我事，最衰都係阿波。搞到Miss連我都嬲埋！

本來我都想抱怨Miss亂發我脾氣，但見到Miss委屈到想喊咁，我於心不忍，所以就好言安慰：「唔難食架！紫薯喎！紫薯難食極都有個譜啦！唔難食，一啲都唔難食！」

我好肯定咁講，令到Miss心情好返啲，佢問：「真係？你唔好呃我呀！」

「真架！」我點頭。





老實咁講，味道唔差嘅，係賣相恐怖、食材配搭古怪同埋食落去個口感令我想嘔唧。唉⋯⋯咁樣唔知算唔算呃佢呢？

Miss聽完佢紅住眼想喊咁，話：「我怕你餓親呀！我琴日挨眼瞓都要幫你整午餐啊！又想你食得健康啲！你知唔知我幾擔心你唔鍾意呀！我放咗好多心機架！」

我望左望右，再三留意到冇人之後，就好快咁錫咗Miss額頭一啖，話：「盈盈，多謝你。你真係好體貼。其實我好感動架。我知你好錫我呀！」

Miss望住我本來扁緊嘴，但佢忍唔住要笑一笑，問：「真係？」

「真！低B仔唔會講大話呃你！」





Miss笑出聲，好想踏前大大力攬住我，但佢猶豫咗一下，就話：「咁我繼續整比你啦喎！」

吓⋯⋯

吓？！！

喂！你仲嚟？！

「做咩呀？」Miss見我遲疑咗幾秒，佢又擔心起嚟：「你唔想要？」

「唔係！」

「嘻！咁你想食咩？」

唉⋯⋯呢啲叫自掘墳墓呀！





為咗聽日好過啲，我又唔想令Miss唔開心，我諗緊有啲咩嘢食係地獄廚神都可以煮到。

「就⋯⋯蕃茄炒蛋呀！」呢個應該白痴都識整掛。我笑住話：「夠健康又好食。」

「蕃茄⋯⋯炒蛋。」Miss諗咗一諗，就點頭：「嗯！就呢個啦！」

神啊⋯⋯祝福我呀。

同Miss拍多陣拖，喺花園度趁冇人時Kiss咗幾啖之後，Miss就準備要返去教員室做嘢。

「盈盈。」我叫停咗佢。

「嗯，點樣？」





「我地都一齊咗一個月啦。我想⋯⋯」

「想送禮物比我？」

嘩！你咁樣屈都得？

「我想做一件事，但要得到你同意先。」

「嗯！」

「我想向阿偉佢地三個公開我同你嘅關係。」

「吓？！咁⋯⋯」Miss表現得唔太接受。

「你放心，我唔係想佢地面前威。我諗緊嘅係，我同你都一齊咗一個月，又經歷過分手，已經有感情嘅基礎。」我慢慢捉住Miss隻手，話：「我知道地下情係對我地係最安全。但我諗到一個更重嘅嘢就係，你喺我心目中真係好重要。我想喺我最好嘅朋友面前肯定呢個地位！肯定你嘅身份！至少，喺佢地面前我可以好光明正大咁講『Miss Wong係我女朋友』！」





Miss呆咗一下，我見到佢眼泛淚光，好似回憶起啲嘢，佢忍唔住要講：「以前Vick⋯⋯死都唔肯承認我。點解一個十六歲嘅細路，可以比大人咁有勇氣去承擔嘅？」

嗯，年青人對愛情就係咁直接同不計後果架嘛！

Miss好努力咁唔好令自己喊，佢又話：「Sorry, 我又提起Vick。但你真係比佢⋯⋯實在好太多太多啦！所以⋯⋯」

「所以？」

「我同意你咁做！」

「真係？！」

「係啊！」Miss搣一搣我鼻頭：「我其實都想喺佢地面前光明正大一啲！我覺得佢地可以幫我地保守秘密！」





「咁太好啦！」

「時候唔早，我要返去做嘢啦。」Miss：「你都搵返佢地去玩啦。」

我搖一搖頭：「就考試啦。我想留喺度溫下書。」

Miss聽到我自動自覺要溫書就流露出好欣慰嘅表情，佢話：「咁你比心機啦。Bye !」

「Bye Miss!」

見住Miss走之後，我獨自一個留喺「空中花園」溫書。我地學校一放午息就好似放羊咁，除咗呢度應該冇地方好啱溫書。

踏入冬天，意味住成個上學期已經過咗一半，好快要迎接上學期考試。

向來讀書一般，操行又差嘅我本來都想hea咗個考試算數。但自從同Miss一齊後，一來成日比佢捉去讀書啦，同埋上次狗公周件事真係搞到我好難升到班。二來，亦都係最主要原因就係我唔想Miss擔心，佢真係好想我升班。所以我就「汁都撈埋」，午息都拎嚟溫書。

同埋，當我表現得上進嘅時候，我見到Miss真係好安慰同好開心。我知自己只係一個學生，物質上我一定冇可能滿足到Miss。 但感情上我絕對可以滿足到Miss。 所以近排我讀書真係愈讀愈起勁！或者⋯⋯我知道讀書就係拉近我同Miss距離嘅方法！

不過⋯⋯邊有咁順利呀。喺我暖到 上心時——噗！

花園四處發出咗啲怪聲吸引我注意。

然後喺我面前不遠之處憑空出現咗粒羽毛球。

我行上去拎起粒羽毛球，四圍咁望。我細細聲話：「咦？邊度嚟架？冇可能由操場打到上嚟喎！」

話口未完，又一聲——噗！

又有一個羽毛球落喺我腳邊。我拾起佢，又四圍望。當我思考緊呢兩粒羽毛球係點嚟時——噗！

「哇——！」我痛叫咁聲：「嘶哇——！咩事！好痛！」

我額頭被嘢掟中，然後我腳邊有一粒棒球。

呢個時候我聽到——

「Yes!」

係一把女仔聲。

女仔？

即係對面女校？

我望過去女校時，露天花園上有個女仔已經拎起粒波——

呼——！佢一嘢掟埋嚟！

我接唔住，中咗落塊面度！

「哎吔——！」好痛！

「哈哈⋯⋯又比我陰到！」對面個女仔笑得好開心。

我嬲嬲地望返去女校嗰邊，細心望清楚掟波嗰個女仔到底係邊個！

我望到佢戴住個棒球手套，右手把玩手套裡嘅棒球，嘴角揚起嘲弄嘅笑意。

此時，佢腳提起，白色嘅校裙起舞，青春嘅馬尾都揚起咗，簡直係一個完美嘅投球動作！佢右手握球，對住我就——「中啊！」個女仔大喊一聲黎，一手將棒球掟過嚟！

啪——！我徒手接實⋯⋯哇！冇用手套接原來係咁痛架！

我心下有氣！即刻準備掟返過去時，我就發現個棒球原來包住咗張紙。

攤開，係一手好靚嘅女仔字，寫道——

.

「你幾好嘛？」

.

蟲蟲滿心期待咁微笑，一啲感受唔到佢嘅敵意。同琴日一開始就摑我嘅蟲蟲分別好大，好似變咗另一個人咁。

「嘻嘻⋯⋯」蟲蟲嘻笑聲聽落又幾可愛。

佢起手，準備又對我投球！