真人真事改篇﹕師生戀﹕《最接近的陌生距離》: 第三十六章之三

「哈⋯⋯哈⋯⋯」

晚上兩點，我睡房。我抱住Miss瞓，但佢係咁傻笑，搞到我地兩個都瞓唔到。

「哈⋯⋯」

「你仲笑緊？」

「你家姐份人同你一樣咁搞笑。頭先佢講你細個啲嘢真係好好笑呀！小六咁大個仔仲喺條街度賴屎！哈哈⋯⋯」





「喂呀！佢吹水咋！」我抱怨咁講。停一停，繼續講：「所以你今晚好開心？係咪？」

「嗯！」Miss喺我懷內點頭：「好耐冇試過呢種感覺啦！」

「係咩感覺？」

「屋企囉。同屋企人一齊食飯，一齊笑。真係好開心架。」Miss笑一笑，但接著有一種難過說：「我自己一個人住都差唔多五年。其實⋯⋯」

「嗯？」我聽到Miss欲言又止。佢跑呼吸頻率亦漸漸改變





「其實每晚我都好孤單架。」

我聽到Miss有啲傷感，馬上錫佢額頭一啖。佢就好似隻貓咁，捐咗落我心口度嗲我。

「就算同Vick一齊嘅時候，佢都唔會陪我。呢五年嘅獨自生活令我就快忘記咗家庭溫暖嘅感覺。」Miss嘆一口氣：「平時做嘢攰，壓力好大，仲要受晒委屈⋯⋯呢一切一切都係我一個人去受。」

我感覺到Miss膊頭開始震緊，佢抖一啖氣繼續話：「我係幾咁希望，每一日當我返到屋企打開度門嗰一刻會有人問我『盈盈今日攰唔攰呀？』『你今日過得開唔開心呀？』『家姐你返嚟啦？』『盈盈我地等緊你開飯呀。』。但事實上⋯⋯」

Miss開始飲泣，哽咽咁講：「事實上，你都見到啦⋯⋯我屋企只係見到一堆書、一啲擺設、家私，然後就咩都冇。」





Miss抱得我更緊，又話：「所以一星期我其實好開心架！放工有人煮晚飯比我食，屋企有人等緊我、掛住我、歡迎我⋯⋯我⋯⋯我真係覺得好幸福架！即使返工受晒氣我都唔再驚！低B仔⋯⋯我⋯⋯我⋯⋯」佢抱我抱得好緊好緊，再講唔到落去。

我聽到Miss又用一把喊聲講。佢其實好易喊，只因為佢一直都被悲傷充滿住內心。好似脹咗嘅氣球，一篤就爆。

「點解你唔嘗試返去同屋企人住嘅？或者佢地等緊你呢？」

Miss喺我懷內搖頭，話：「我對佢地已經死咗心。我唔想再對住佢地！我對佢地冇晒希望！」

「佢地即係指？」

「成家人！兩個細佬、爸爸同媽媽。」Miss講得有啲激動：「本來我只係憎我爸爸一個。後來，我發現自己連媽媽同細佬都憎埋！」

Miss開始喊得激動：「我兩個細佬好冇用，好自私！明知媽媽被爸爸傷害緊，佢地都唔識保護媽媽！」

「但你話你連媽媽都憎埋？但你想保護佢喎？其實實情係點架？盈盈，我好想知道你成長係點。我想同你分擔。我覺得你每一日都好攰，好多重擔呀。不如比我幫你呀！」我摸住佢髮尾講。





Miss努力壓住自己情緒，佢好怕會爆到一發不可收拾。但佢最後都忍唔住話：「正正因為成家人當中，我最錫就係媽咪呀！所以我最嬲同最憎既人係佢啊！嗚⋯⋯⋯！」

Miss最後都係係忍唔住大大抱住我喊！佢亦喊出咗內心嘅傷同痛。

愈同Miss日子耐，我就愈了解佢。我開始明白，點解初初識佢時，佢會一面高冷女王呢個形象。呢個形象係一堵牆，用嚟保護佢脆弱嘅內心世界。

我冇再問落去，怕只會令佢更難過。我喺佢額頭上錫咗一啖又一啖。

由初初識佢時，我就感覺到佢種係有一種孤獨悲慘嘅感覺。原來唔只係因為工作上被同事孤立，更來自家庭嘅破碎。

佢呢份孤單令我心都痛埋。我唔想Miss一個人面對呢啲事情。我緊緊抱住Miss，將佢貼喺我胸前。聽到佢喊聲，我好自然慢慢哼起咗一段旋律。一段我好似聽過，但忘記名字嘅旋律。

只知道Miss聽到呢個旋律之後，哭聲就慢慢收細，佢跟住我一齊哼住呢首歌。然後——





.
「風裡笑著風裡唱，感激天意碰著你。」

佢一邊想忍住唔喊，一邊唱住歌。

.

「縱是苦澀都變得美⋯⋯」

Miss深吸一口氣，將喊嘅感覺壓住，⋯⋯

.

「天也老任海也老 唯望此愛愛未老⋯⋯」





Miss一邊哽咽，一邊喺我懷中唱住呢首歌。

.

.

「願意今生約定，他生再擁抱。」

.

.

「低B仔。」

「嗯？」





「多謝你愛我。」

= = = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師