真人真事改篇﹕師生戀﹕《最接近的陌生距離》: 第三十七章之一

呼⋯⋯呼⋯⋯⋯「唔？」

我緩緩張開眼，仲帶住濃濃嘅睡意，但好快被一股香味搞醒咗。

「盈盈⋯⋯咦？」我正想整個morning kiss 比Miss時，先發現佢原來唔喺我身邊。然後我落床行出廳，我唔止聞到陣香味，仲聽到廚房打仗咁嘅聲。然後啲香味就慢慢變成咗燶味。

「搞咩咁嘈呀？」家姐打住個喊路行出房：「廚房咩事呀？」佢心知不妙走入去廚房睇下咩環境。

然後我聽到Miss尷尬嘅笑聲，佢話：「啊？Sorry，係咪嘈親你？」





「睇火啊！」家姐把聲好驚！

然後一下火光，就飄咗啲煙出嚟。嘩！有火喎！嚇到我即刻上去睇下咩事！

我眼前一片煙霧彌漫，家姐被煙嗆到狂咳。然後我見到Miss拎煮個Pan，慢慢行出廚房，對我傻笑：「你醒啦低B仔？我煮咗早餐比你！」

佢向我遞起個Pan。 我只係見到一堆疑似由煉金術變出嚟嘅不知明黑色食物。

.





.

「火腿煎蛋呀。」Miss唔好意思咁吐一吐舌：「啱唔啱食呀？」

= = =

「哇！你女朋友係就係生得靚。但佢煮嘢真係災難級喎！」

家姐呢句說話搞到我忍笑忍咗好辛苦！份早餐點食得人呀？！最後索性早啲梳洗換衫同Miss返學走人。





「你想笑就笑出嚟啦！」Miss知我想笑，開始面露不悅：「係呀！我就係咁架啦！我唔識煮飯架！平時一係食沙律，一係食7-11啲叮飯架咋！枉人地仲一朝早想煮早餐比男朋友食呀！」

「盈盈呀，我知你一番好意啦！」我輕輕搖佢手肘。

「哼！」Miss瞪我一眼：「唔好掂我呀！」

「唉！最衰都係謝子瑜啦！係佢講嘢好笑，搞到我咁！」不過火腿煎蛋都搞到火燭咁，又真係幾好笑嘅。我又心諗，如果佢繼續咁樣嬲爆爆落去唔係辦法，用老師身份發女朋友脾氣，就等住全班一齊攬炒！都係嗱嗱聲氹返佢先！

「盈盈呀！」我停低咗，Miss行前幾步先嬲爆爆咗望返過嚟。我就話：「對唔住呀！唔好嬲啦！」

「我都冇嬲！」Miss：「你再叫我唔好嬲！我就即刻嬲比你睇！」佢鼓起腮子。

「嗱！咁即係迫我氹你啦！」

「唔要攬唔要錫！呢度街嚟架！開始多學生啦！」佢嬲嬲地之下講呢句說話好似特登出嚟試下我會點氹佢咁。





「咁我唱歌囉！」

「吓？唱咩歌呀？」

「風裡笑著⋯⋯」

「喂呀！」Miss即刻紅起塊面，勁怕羞咁講：「唔聽呀！唔聽呀！」

琴晚佢唱完呢首歌，心情平服晒，我同佢就慢慢瞓著咗。呢首歌對Miss有好深嘅意義，包含住佢嘅過去。感覺上，佢只係會唱比佢深愛嘅人聽。所以呢首歌已經變成我地嘅訂情嘅歌。

不過我冇諗過呢刻Miss會咁大反應，未見過佢咁怕羞。然後佢索性急步咁走：「唔聽呀！唔聽呀！」

「咪走啦！我把聲都好似張國榮架！」我截住佢喺佢前唱：「感激天意⋯⋯」





Miss被我搞到哭笑不得，佢笑住咁鬧：「你⋯⋯你啊！你唱得好難聽呀！唔准破壞呢首歌呀！」

「你係咪仲嬲呀？仲嬲我就⋯⋯天也老，任海也⋯⋯」

「唔聽呀唔聽呀唔聽呀！」Miss拿拿聲走人。

呢首歌好似一嘢打中佢弱點，令Miss忘記咗自己喺返工嘅路途上，變成咗一個怕羞到爆嘅女仔。我覺得佢呢刻實在太可愛！我即刻追上去喺佢耳邊繼續唱。佢一邊笑一邊嗌晒救命咁，最後一手掩住我嘴，笑住講：「得啦！唔嬲你啦！唔准！唔准呀！你夠啦吓！」

「嗚⋯⋯唔⋯⋯啊⋯⋯准⋯⋯咩？」我想話「唔准啲咩」佢掩住我嘴搞到我句說話都模糊起嚟。

「唔准⋯⋯破壞，屬於我同你嘅歌。」Miss含羞咁講。

我輕輕捉開Miss隻手，講：「我早就知道呢首歌——」

.





「咦！阿匡？」

.

呢把聲截住咗我！更令我同Miss大吃一驚起嚟！

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師