真人真事改篇﹕師生戀﹕《最接近的陌生距離》: 第三十七章之三

「搞咩呀？阿偉呢個時候都仲未返學？」我吃驚咁講。

小息時得返我同阿波坐喺小賣部度傾計。我仲打算有偉神比橋我睇下今朝件事可以點拆。順帶一提，杰少今日都係冇返。

平時呢張枱一定人齊。但今日得返我同阿波兩個都咪話唔唏噓。

「偉媽話佢今日病咗呀。」阿波一手雞髀，一手可樂。

「佢好少病架喎！偏偏最想佢幫手時，佢又唔喺度！」





我手指敲緊張枱，心事重重諗緊嘢。始終今朝嘅事真係會好影響Miss，我點都要堆定沙包先。但又唔可以太明顯，唉！阿波戇鳩架嘛！睇佢個款都係被Apple食住。⋯⋯啊！有計。

「阿波，仲記唔記得我同你地公開我同盈盈關係嗰日發生咩事呀？」

「喂！你唔好再提呀！」阿波驚到抱胸：「我粒lin lin痛咗幾日呀!」

我暗笑，話：「咁你都好明白件事唔揚得架啦！」

「梗係知啦！害死阿盈架！」阿波識得喺呢個話題唔提「Miss」呢個名，算佢有進步啦！咁我又放心咗啲。





「係呀！咁係記得任何情況下都唔可洩露呢件事！包括女朋友問你都唔講得！」

「知道知道！」

我指住佢，好嚴厲咁講：「我同你講呀！如果揚咗出去，冇兄弟做架！實反面架！」

「知道啦匡哥！」

咁我就放心晒。





同一時間，杰少怒氣沖沖走埋嚟，佢躁到一腳踢開垃圾桶！我見佢仲孭緊書包，似乎啱啱到咗學校。

「嘩！你食咗火藥喎！遲到比訓導鬧呀？」我

杰少瞪我一眼，呢位兄弟從來都未試過咁對我，佢搞咩呀？

「關你條女事呀！」

「盈盈？喂⋯⋯阿波！」我示意阿波幫手買枝可樂返嚟。我繼續同杰少講：「佢鬧你呀？」

「有佢講冇我講！我想解釋都唔得呀！」杰少好少發咁大脾氣，佢繼續鬧：「如果嗰個唔係你條女？我神早郁咗佢啦！」

Miss今朝心情比Apple搞到唔多好，估計佢鬧杰少都鬧得好惡下。

「大佬！可樂到！」





「你不如慢慢講下咩事先。」我將枝可樂遞比杰少等佢冷靜下。

杰少飲咗啖可樂後就繼續訴苦：「佢唔係唔知我同你係兄弟呀？比返少少薄面都唔得！佢今朝追魂call我老母，捉我返嚟呀！」

又係呢招，我領教過。

「一朝早嘈生晒！我老豆斷咗腳要休息架嘛！佢就係咁打比我老母！嘈住我老豆休息！」佢將可樂當酒咁飲：「本來我準備返緊工架！老母拉鬼住我！屌！仲迫咗我返嚟！」

杰少老豆斷腳之後就冇工開，老母又要照顧細佬妹，所以佢屋企經濟暫時應該都係咬緊積蓄。睇佢咁氣急敗壞，杰少真係好需要錢。

「頭先一返嚟！佢問都唔問我就噴我啦！話我缺席多三日就留硬班！仲叫我小心啲添！」杰少一口氣飲晒枝可樂：「仲話考慮記我小過！呢下我火都嚟！唔係唔知我同匡哥你係兄弟呀？咁樣好唔比面囉！」

杰少爆到咁勁，我都唔敢幫Miss講啲咩。只係拍下佢膊頭就算。





「阿匡，我同你由小一做兄弟到今日。你幫唔幫我先？」

「幫啲咩呀？」

「你答我先啦！呢鋪撐唔撐我呀！兄弟！」

「撐！兄弟喎。」

「咁得啦！」杰少拍一拍我肩：「幫我求你條女，唔好記我小過。」

「吓？」我吃驚咁叫。

「再記過我操行就落到去C+。我十幾日冇返學，加埋嚟緊考試炒咗架話！我實留班架！」

我想同佢講，冇可能架喎！Miss好重視老師呢個身份，佢一定唔會咁做！正當我想講時，杰少又用好誠懇嘅眼神同我講——





.

「我地做咗兄弟咁耐，我冇求過你！就一次咁多啦！阿匡！我唔想老豆斷腳都要煩我啲嘢！就幫我一次啦！」

.

一邊係友情，一邊係愛情⋯⋯

阿偉，我可以點做呀？

= = = = =

ar_honG_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師