真人真事改篇﹕師生戀﹕《最接近的陌生距離》: 第三十七章之二

「咦？係Miss Wong喎！」

「早晨呀！同學！」Miss好快放開我隻手，強作鎮定咁揮手。

「Hi——」我就冇Miss咁鎮定，因為眼前呢個人係——「Apple，咁早返學嘅？」

除咗有Apple， 仲有冬冬同樂樂。佢地頭先睇到晒我同Miss打情罵俏嘅畫面？

「係呀！我地不嬲咁早架！」Apple又八婆上身，佢用奇怪嘅眼神望住我同Miss：「係呢，你地又咁早嘅！」





佢呢句明顯挑釁緊我地，唉⋯⋯點講都好，頭先我同Miss嘅動作點睇都係出晒事，呢次冇得兜！愈兜愈死！

「老師要早啲返去架嘛！」我鎮定咁講:「我係班長都要早返去班房。」

Apple嘴妙妙咁打量我同Miss，然後同身邊兩個姊妹講：「你地覺唔覺得佢地好古怪呀？」屌⋯⋯又係以為自己講嘢好細聲，實際係大聲到不得了。呢點佢同阿波非常之似。

樂樂相對明事理，只係搖搖頭，示意唔好理。

「都話咗阿匡唔係好人嚟架啦！」Apple發咩神經呀？





Apple忽然擰轉頭過嚟，就問我：「喂！你唔覺得奇怪架咩？」

「有咩咁怪呀？」我本來想講埋「我同Miss咁啱撞到架咋！」但啲19電視劇話我知，講得出呢句都係十成中伏。

但我估唔到，但更中伏更大鑊嘅事即將發生！

「得我地三個咋！你做咩唔問蟲蟲係邊度呀？」Apple好似想幫個姊妹出氣咁！

仆街！我眼都凸埋！呢下係雙重陷阱！如果我望Miss一眼即係我心虛，Miss必嬲！更大鑊係，對面會覺得我驚Miss嬲，實覺得我同Miss有嘢！





我冷靜咁笑，講咗句：「咦？係喎！」

「哼！扮晒嘢！早幾日仲等緊人！」哇！Apple出大絕！

「我地走！」Apple成個大家姐款咁拉隊走人，當經過我身邊時仲攞多個尾彩：「渣男！」

當然Apple呢句係講埋比Miss聽啦！

睇住佢地走咗之後，我先同返Miss講嘢。但感覺一朝早營造好嘅甜蜜氣氛被Apple破壞晒。

「嗰個肥妹仔係阿波女朋友。係咪真係好八婆啊？」

「嗯。」

唉，大鑊Miss唔多高興。我地開始行嗰時，Miss行開咗少少，隔咗一個身位距離。我知道佢只係想避嫌唧。





「孖辮嗰個女仔就係杰少女朋友囉。聽講都幾拜金下。」

「係咩？」

「仲有高高地嗰個，好似係阿偉嘅女朋友。但冇聽阿偉講有冇正式一齊。」

「嗯⋯⋯」Miss望住我微笑：「佢地4個女仔當中，有3個係同你啲兄弟係一對嘅，都幾啱喎。」

「啊⋯⋯係呀！」我心諗佢問得呢句感覺都係中中地伏。

「仲差一per！」Miss笑住講，但我感覺到好有醋意！

我都知佢想講蟲蟲，我惟有咁講：「係呀，呢幾日放學有啲事要搵佢。」





「哈⋯⋯哈⋯⋯你會唔會太坦白呀？」

坦⋯⋯坦白⋯⋯？

「係呀！驚你呷醋嘛！我同蟲蟲本身約咗想再探陳婆婆嘛。」

「哦。」Miss好似表示緊佢理解：「Apple話你等人喎。即係咩意思呀？」

「我冇佢電話嘛！未喺佢學校附近等囉。」

咁⋯夠坦白掛？我記得初初想搵蟲蟲好似唔係呢個原因⋯⋯

只見Miss仲一面愁容，佢心事仲未解開。於是我問：「你嬲緊我呀？」

Miss搖搖頭，佢話：「我擔心緊我同你嘅拍拖呢件事會比人知咋。」





唉⋯⋯係。頭先捉住Miss手呢個畫面真水洗都唔清。

「我同阿波講兩句。叫佢女朋友唔好咁多嗲！」

「你傻架咩！你咁做未仲比人覺得我地有嘢！阿波咁真心，比人問兩問就講晒出嚟啦！」

「咁⋯⋯我問下阿偉點搞。佢實有方法。」

「算啦。唔好搞咁多。順其自然啦。」

「嗯。我信冇事嘅。」

我同Miss去到學校門前，就各自分開行。

= = = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師