真人真事改篇﹕師生戀﹕《最接近的陌生距離》: 第六十八章之五
「得啦⋯⋯得啦⋯⋯⋯我匿喺被入面,戴晒hand free啦!阿爸阿媽唔會知架啦!」
「哼!」
食完冬至飯,我趁屋企人休息,我又視象Miss。
「唔好嬲啦!盈盈豬!」我扮個豬樣出嚟,我估到佢嬲我衝動架啦,所以視象一下佢,氹返佢開心先。
「你匿喺被入面,成個畫面黑晒啦!我都見唔到你嘅!」
「好⋯⋯好⋯⋯」我撥開張被,房燈嘅燈光照返落我塊面:「咁得啦掛?」
「你個樣哄埋啲部電話度!」
「係⋯⋯係⋯⋯」我照佢說話做。
「死低B仔——!」
然後我聽到啪啪聲,正正係佢係咁打個鏡頭,當係打緊我額頭。
「哎吔!哎吔!」氹Miss開心梗係要交足戲啦!
「咁衝動!咁衝動!」佢係咁打個鏡頭。
「唔好打呀⋯⋯哎吔⋯⋯女王大人⋯⋯我錯啦⋯⋯」
「真係被你玩死啦!痴線架你!我好彩有戴bra咋!如果唔係畀你成家人睇晒啦!」佢係咁打,係咁打:「衰人!死八公!死低B仔!我跌晒膊咁好失禮呀!」
「冇人叫你著我件衫架嘛!」
「邊個畀你講嘢呀!額頭呢?!」Miss指住鏡頭鬧。
「係⋯⋯哎吔⋯⋯好痛⋯⋯哎吔⋯⋯女王大人⋯⋯大力啲⋯⋯哎吔⋯⋯key 摩芝⋯⋯」
「激死我啦!唉⋯⋯而家穿晒煲啦!」Miss好擔心咁講。
「你放心喎!我老豆仲覺得我係基架!」
「噗——!」Miss忍唔到笑,但又要扮返嬲講:「我而家好驚呀!你媽咪一定知啦!頭先⋯⋯」
「頭先佢叫你年三十上嚟食飯喎!」講真,阿媽呢下都嚇死埋我。
「係囉!咁⋯⋯咁突然嘅⋯⋯」Miss面色慚慚發青:「我⋯⋯我都唔知用咩身份過嚟⋯⋯唔通家訪呀?」
「女朋友囉!」
「痴線架咩!」
「你覺得我地仲可以瞞到阿媽咩?」我笑嘻嘻咁講。
Miss瞪咗我一眼,嬲到幾秒出唔到聲,然後好大聲鬧:「最衰都係你呀!無端端打電話嚟!仲要係視象!死低b仔!死低b仔!」佢又打到部電話啪啪聲。
「扮咩呀!你最後都叫咗我阿媽做Auntie 啦!」
Miss面即刻紅到蘋果咁,之後佢「啊~~~!」羞澀一叫,就搵捐落張被度,話:「唔好再講呀!好瘀呀!」
「你仲叫錯我老豆做Uncle添。」
「哎吔!」Miss捐返出嚟,面紅紅,披頭散髮:「你係咪玩Miss Wong呀!夠啦吓!」打多鏡頭幾下。
「唔玩啦。都玩咗你成晚啦!」我收起嬉皮笑臉,正經咁講:「你知我想點架。盈盈。」
「梗係知啦。」Miss都正經起嚟,表情望落有啲Sweet卻又有啲憂心。
「盈盈呀,我終於明白點解你要我珍惜屋企。因為如果我今日唔返去的話,我根本就唔知原來有一個完整屋企幾咁幸福。」我深深咁望住電話裡嘅Miss:「屋企人煮好飯歡迎我返嚟,真係好開心。」
「嗯⋯⋯有得珍惜要好好珍惜呀。」
「阿媽今晚冇鵝我;家姐又冇拎我啲成績嚟講;老豆又冇鬧我⋯⋯個畫面好靚,好融洽。嗰時我就諗起你。盈盈⋯⋯」我望住電話裡面嘅Miss,佢又夾硬壓住情緒。我繼續話:「我好想你今晚都可以喺度。我就係要畀呢個屋企你。」
「嗯⋯⋯」
「我真係好想喺家人面前承認你!盈盈⋯⋯你做我屋企人呀!」
「太早啦!」Miss講得有啲斬釘截鐵。佢又怕會令我亂諗,於是連忙咁講:「我⋯⋯唔係唔想公開關係。老實講我頭先都好開心。只不過時間太早,我地先一齊三個月唔夠。同埋呀你未考Dse架,你父母一定反對啦,佢地會點睇我呀?」
「好老師囉!我阿媽都估到架啦。佢有冇反對呀?佢仲叫你年三十上嚟食飯添!退一百萬步講,我父母而家真係反對!只要我做乖仔,讀好書,上埋大學,我就可以保護到你!」
「係咁易就好啦。」
「你唔信我會上大學咩?」
「我信呀。我擔心嘅係呢個世界唔係你諗得咁簡單。奸險嘅人總比好人多。我同你嘅事唔係靠你讀好書,甚至你父母支持我地就得。」Miss停一停,一面欲言又止,過咗一兩秒先講:「不過⋯⋯方法唔係冇嘅⋯⋯」
「嗯!係咩方法呀?」
「只要我唔再係你嘅老師⋯⋯」
「唔得!你唔喺度,咁我點算呀?唔好講笑啦!」
「我唔係講笑架。我⋯⋯」Miss低一低頭,滿懷心事,當佢抬起頭嚟時又一面不捨。
「盈盈⋯⋯咩事呀?」
「我打算辭職——」
.
.
「——然後過去英國讀書。」