真人真事改篇﹕師生戀﹕《最接近的陌生距離》: 第六十九章之一

 
「⋯⋯我打算辭職，然後過去英國讀書⋯⋯」
 
Miss嘅說話敲響我心入面嘅鐘，鐘聲徘徊不散。我笑容慚慚消失，望住一面難過嘅佢，久久不能說話。
 
Miss歎咗一口氣，話：「其實我諗咗好耐架啦。考慮咗好多因素先有呢個決定。低B仔，你知我好憎爸爸⋯⋯」
 
「嗯。」
 
「我唔想行佢要我行嘅路！但我其實好想教Sen嘅小朋友讀書。所以⋯⋯唉⋯⋯」Miss嘆咗口氣後再講：「現實好多事情唔到我話事，我好想幫助梓康呢一類嘅同學。但現實就係學校要威、要面。所以一係谷人入大學，一係贏出面嘅比賽。我根本冇時間去做我想做嘅事。所以我覺得老師呢個身份其實阻礙咗我想幫嘅學生。」




 
「你唔做老師咁可以做咩？」
 
「教育心理學家？藝術治療師？唔知呀，我仲諗緊。不過可以肯定嘅係，我而家係需要讀多個Master先可以轉到行⋯⋯所以⋯⋯。」
 
「所以⋯⋯你要走。」猶豫咗陣，差啲將「掉低我」講出口。
 
「嗯⋯⋯」Miss無奈點頭。
 
剎那間，我地只係對望而冇出聲，我地彼此有好多說話想講但講唔出口。大家都好驚接住嚟嘅每一句說話會傷到對方。




 
過咗一陣我先講：「咁⋯⋯要讀幾耐架⋯⋯」
 
「睇我修啲咩啦。可能要三年到四年⋯⋯」
 
「吓？！」我終於忍唔住，稍為激動起嚟：「咁我地起碼有幾年見唔到架喎！」
 
「係呀⋯⋯要⋯⋯要Long D架。都⋯⋯唔係唔見嘅，我會放Sen break 架嘛！我會⋯⋯返嚟嘅⋯⋯」Miss愈講愈細聲，睇嚟佢自己都知說服唔到我。
 
異地戀⋯⋯剎那間，我講唔到嘢，個人好似冰封咗咁。




 
Miss見我久久都講唔到嘢，就笑咗一下嗌我：「低B仔呀⋯⋯」佢想用温柔嘅聲音令我振作起嚟，佢繼續話：「我又唔係聽日要走，唔好扁晒嘴啦。」
 
「嗯⋯⋯咁⋯⋯哈哈⋯⋯都啱嘅。」氣氛好尷尬，我連忙諗下啲笑話緩和一下：「你過咗去之後，我同你一樣都係學生囉！哈哈⋯⋯我同你嘅距離收窄晒啦！」
 
Miss笑得有啲牽強。也許佢都知呢個決定對我來講係好有衝擊性。
 
「咁⋯⋯聽落都唔係壞事呀。你做到想做啲嘢都重要嘅⋯⋯反正我地拍拖又唔見得光⋯⋯」我愈講愈細聲。
 
「Sorry⋯⋯」
 
「做咩講Sorry喎，你過咗去即係代表你屋企嘅問題已經處理晒！我同你又唔洗驚被人篤爆搞師生戀！喺英國鬼有人識你咩？！哈哈⋯⋯係咪先？哈哈⋯⋯」我扮到好豁達，但我嘅難過其實收埋喺骨入面。
 
Miss眼神好似睇穿咗我⋯⋯應該話佢好聰明，冇嘢瞞到佢。邊有人想Long D架？
 




Miss嘆咗口氣，笑返對住我講：「之後再講呢件事啦。聽晚食飯喎！你準備成點呀？」
 
「有咩要準備呀？」
 
「唔係你book地方咩？」
 
「我book架咩？！」
 
「梗係男朋友book架啦！」
 
「咁食譚仔囉。」
 
「你係咪要打打呀？」
 
我地將話題轉咗去聽晚食飯。但我感覺到我地兩個人之間又有返個距離感。大家笑住傾，但其實並唔係特別開心⋯⋯