真人真事改篇﹕師生戀﹕《最接近的陌生距離》: 第七十章之二
侍應為Miss倒咗杯紅酒。酒影喺餐桌上透出一片晃動嘅紅光。
「Miss Wong⋯⋯」我雙手合十，好似拜佢咁，求佢話：「我又要飲！」
「唔得呀！你未成年呀！唔准飲！」
「聖誕節喎⋯⋯放假喎⋯⋯我今日望落都似18歲啦！」
Miss諗咗一諗，見佢態度有啲軟化，過咗陣佢就話：「人地肯斟畀你先算啦。」講完之後，佢向斟酒嘅侍應招手。
侍應低頭，將耳仔挨近Miss。Miss喺佢耳邊唔知講咗咩，一來佢唔似講緊英文，二來又講得好細聲。只知道侍應聽完之後，佢對眼好狐狸咁瞇起望住我，對我打量一番。
Miss同侍應講完嘢後，揸住杯紅酒琅下琅下，樣子好自信，亦好期待接住發生嘅事。
外國侍應埋嚟我身邊，對我微微一笑，就斟咗杯紅酒畀我。我嚟唔切反應，Miss就對我舉杯：「Cheers！」
「chee….cheers!」我拎起杯身正想同佢碰杯。
「哎呀！唔係拎杯身呀。好似我咁呀。」Miss指示我要拎住杯腳：「乜都要我教你嘅！」
「Sorry。」唔係嘛，拎酒杯都咁講究？
「Cheers！」Miss迷人咁甜笑，眼神充滿期待。
「Cheers！」
叮——！碰杯！喺燭光襯托下，浪漫嘅氣氛盤旋喺我同Miss之間。
Miss呷咗啖酒，將酒杯停喺嘴前，紅酒揮發出唔只係香醇嘅酒味，仲有激發咗Miss高貴嘅氣質。我好開心，內心嘅甜蜜正慢慢擴散薪開去。我女朋友真係好完美，唔只溫柔，有學識，生得靚，仲要有氣質。我真係好幸福，可以遇上Miss Wong。初初用餐時，我同佢都唔敢傾偈怕影響咗氣氛。即使我地好安靜咁食嘢，當中更有一種無形又深度嘅交流。食到咁上下，Miss Wong終於忍唔住想細細聲同我傾偈。
「我估你都唔記得架啦。其實知唔知未開學時你就已經得罪咗我架啦？」Miss笑住怪罪我。
「吓？我⋯⋯我開學之後先識你架喎！」
Miss搖一搖頭，放低刀叉，嚴肅咁講：「開學前三星期，我坐喺球場旁邊啲櫈度。你請我食咗個波餅！」
「咩⋯⋯咩呀⋯⋯有咩？」
「有呀！你搞到我副眼鏡爛咗添呀！」
「我⋯⋯我唔記得喎！有咩真係？！」
「我嗰日嚟見工嘛！點知校長即刻請我喎！叫我下晝開會。咁我未喺操場旁邊嘅櫈坐低等囉！點知你就一個籃球掟埋嚟喇！」
「車！咁練波呀嘛！邊個叫你坐喺球場邊啫！」
「啊！講大話！」Miss指住我：「仲唔捉到你！你根本就記得！」
Miss嬲到控制唔到激動起嚟，點知——
「Excuse me. 」侍應食指抵喺唇上，示意Miss靜啲。Miss即刻面紅，我就忍笑忍得好辛苦！
「你仲笑！呢餐你畀錢呀！」Miss用氣聲鬧我。
「咁未證明咗我同你好有緣囉！」
Miss聽完一諗，本來嬲爆爆嘅表情就即刻Sweet晒。佢話：「你把口真係呢⋯⋯哼！呢次我放過你啦！」
講講下佢又提起我追佢時嘅經過。
「點呀！我溝女係咪好勁呀？」我好自豪咁講。
「爛！」Miss瞪我一眼，但又sweet咁講：「但⋯⋯嘻！你知唔知點解我會叫你做低B仔呀？」
「你覺得咁叫我好Cute囉！」
「錯！係因為你追我啲方法真係好低B呀！」Miss翹起手講：「以前啲男仔追我一係送花，一係約我睇戲，約我去玩，將自己最好一面畀我睇。但係你呢⋯⋯做埋晒啲低b嘢嚟激我！」
「啊哈哈⋯⋯」我難為情咁摸一摸後腦。
「又搏畀我鬧啦！搏畀我罰留堂啦！特登駁嘴激下我啦！」Miss好似照緊個清單讀。
「全部都係衰嘢嚟嘅？」
「仲有打交啦！仲⋯⋯仲有⋯⋯」Miss咬一咬唇，羞澀咁講：「仲有喺功課入面同我示愛！」
「啊哈！原來你發現到架？」我勁自豪！交功課溝Miss，應該係我原創！
「你本週記呀！你形容個女仔嗰時我就知係講緊我啦！哼！呢個世界真係得你先諗到呢啲咁低B嘅方法咋！」Miss低頭忍唔住羞澀一笑：「我未試過咁樣被人追囉！」
「係咪好新鮮呀？」
「係好低B呀！」佢瞪大眼笑住嚟鬧我。
「唓！不過⋯⋯你講漏咗一樣喎。」
「咩呀？」
我咳清把聲，Chok靚把聲講：「『Miss Wong ，我擔心你』」
Miss即刻嚇到張大個口，面色紅到變蘋果咁就「啊～～～！」提起張memo即刻篤中佢死穴，Miss怕羞到dup 晒地。佢咁激動，當然又——
「Excuse me！」頭先個侍應又嚟提Miss。
Miss連環中伏後，佢高貴嘅氣質消失晒，成個傻妹咁想鬧我又鬧唔到，激到牙痕。
算啦，唔玩佢。我舉起酒杯話：「Cheers!」畀個落台階佢啦。
叮——！碰杯，我地繼續一邊開心食，一邊講拍拖嘅開心事。此時，Miss俏俏微笑，話：「低B仔，你合埋眼呀！」
搞咩呀，佢又發神經？我照住佢說話做都唔夠，佢要我一手揞眼，一手伸喺枱上面。
然後我聽到佢嘻嘻笑，喺我左手腕扣咗啲嘢後，佢就話：「得啦！」
我開眼時一望，手腕上已經多隻手錶！
「聖誕快樂！！」Miss輕輕拍手講：「你知唔知我揀咗好耐啦？我諗緊邊一款錶啱你，似返你呢個年紀戴嘅款。最後我覺得Sporty一啲好似啱你！果然！我又揀啱咗啦！」
望住隻錶，我實在係驚喜萬分，就話：「點解會買錶畀我嘅？多謝Miss Wong！」
「嘻——！我就係想你個人守時啲呀！返學唔再遲到，準時交功課，做人要有時間觀念呀！」Miss好Sweet咁講，卻又係老師mode咁教導我。
「唉⋯⋯又畀你搵到位教訓我。」
「啊～～！死低B仔！咁我都係你班主任嘛！唔得咩？」
「得得得⋯⋯總之我聽晒你話啦女王大人！」
「嘻⋯⋯」Miss對我嗡一嗡個鼻仔，笑住話：「咁我嗰份呢？」
「你嗰份呀⋯⋯」
Miss 呢句說話將我一早收埋好晒嘅失落，一下子勾返晒出嚟。由琴晚佢同我講要去英國起，我就不斷喺想唔想留低Miss Wong呢個矛盾上掙扎緊！
如果我放手，我同佢嘅感情就會完，而且Vick會搶走佢！
唔得⋯⋯我唔甘心！唔可以！
我伸手入衫袋，將準備好嘅戒指緊緊地握喺掌心之中！我一定要用最大嘅誠意令Miss Wong留低！
「Miss Wong， 我⋯⋯」
「嗯？」Miss Wong 托住頭，睜大住充滿期待嘅雙眼。
「我⋯⋯你⋯⋯可唔可以⋯⋯」
唔好走⋯⋯唔好走⋯⋯唔好⋯⋯啊！可惡呀！去到呢個關頭，竟然講唔出口？我竟然驚佢覺得我迫佢？
望住Miss Wong 慚慚感覺唔對路嘅表情，我腦海閃過好多片段，最後卻定格喺Vick要送畀Miss嘅戒指！
隻戒指成百萬架⋯⋯我手中嘅戒指同Vick嗰隻相比，簡直⋯⋯簡直⋯⋯唉！我有咩資格要Miss Wong留低陪我？要佢停低落嚟⋯⋯畀我拖累佢⋯⋯