真人真事改篇﹕師生戀﹕《最接近的陌生距離》: Miss Wong特別篇﹕第一章﹕冷戰時……02
16歲嗰年，係Miss Wong命運齒輪開始轉動嘅一年。佢無法忘記嗰一晚⋯⋯
「盈盈⋯⋯」
卡嚓——！手銬扣上手腕嘅一刻，向來剛毅堅強嘅阿祖知道離別嘅時刻到，佢用上最大嘅力氣向最喜歡嘅人講：「聽我話，一定要原諒媽咪。」
黑布幪頭，阿祖被轉身帶上警車，只聽見令佢心碎嘅喊聲：「阿祖！阿祖⋯⋯⋯嗚嗚⋯⋯」
盈盈邊喊邊望住警車絕塵而去，內心碎到一地都係，腦中閃過呢一個月嘅回憶。阿祖，一個想回頭嘅黑幫分子，偏偏呢位被大眾視為惡人嘅男人卻係對盈盈最溫柔、最尊重、最願意保護佢嘅大人。盈盈喊到跪低，個心痛到令佢好緊好緊咁抱住自己，佢好想守護住阿祖留畀佢最後嘅說話——
「記得，唔好出賣自己。」
仲有⋯⋯
「一定要原諒媽咪⋯⋯」「一定要原諒媽咪⋯⋯」「一定要原諒媽咪⋯⋯」
「一定要原諒⋯⋯」
「你喊乜嘢呀？」
冷冷嘅聲音好似一道落雷咁將盈盈從悲傷中清醒。盈盈抬頭，模糊嘅視野慢慢清晰起嚟，見到一個冷漠嘅女人不帶任何感情咁望住自己。
「你係咪仲未覺得丟夠架？」
盈盈望住眼前嘅女人，內心嘅憤恨愈燒愈旺，佢企返起身，抹乾面上眼淚，佢實在唔想再喺呢個女人——媽咪面前示弱！
「你點解要報警呀？！」
「點解要報警？」媽咪好驚訝眼前既乖女竟然變成咁，眼都突埋話﹕「你未成年架﹗你今年得16歲咋﹗你竟然同一個男人一齊住﹗仲足足住咗一個月呀！佢仲要係黑社會嚟架！我咩都知道晒啦！你仲想呃我到幾時呀？！」
「我男朋友唔係壞人呀﹗我冇同佢一齊住！佢只係借地方畀我訓咋！」盈盈回憶呢一個月的相處，佢喊得更激動，因為呢一個月佢感受到嘅唔只係阿祖嘅溫柔，而係阿祖嘅婆婆、阿妹所帶畀佢嘅家庭溫暖。
盈盈真係覺得好諷刺。一個佢生活咗16年嘅家，居然及唔上相處一個月、非親非故嘅家咁溫暖。
媽咪聽到「男朋友」三個字就更加差啲要暈低！佢深吸一口氣，強作冷靜地話：「乜嘢⋯⋯男朋友⋯⋯盈盈！你講乜嘢呀？！」
「我鍾意阿祖！佢好錫我！佢冇迫我做我唔鍾意嘅事！本⋯⋯本來⋯⋯嗚嗚⋯⋯」
盈盈掩面而哭，因為本來今晚盈盈就打算想同返媽媽和好如初。呢一個月以來，阿祖教佢要原諒媽咪，佢一直好努力去學。但就只有盈盈先知阿祖呢個苦心，盈盈媽咪係唔會知。當盈盈講出「男朋友」三個字時，佢媽咪腦裡面第一個諗到嘅畫面係佢寶貝女蝕底畀呢個男人，然後無限災難化件事，就好似點起咗藥引，一直燒一直燒直到將佢搖搖欲墜嘅「婚姻」引爆！
媽咪已經唔再聽盈盈任何解釋，佢緊緊捉住盈盈隻手，嘗試扮出和藹嘅樣貌氹盈盈地講：「總之……其實媽咪好掛你，我好愛你架盈盈！我地返屋企啦。你答應爸爸今晚要返屋企架嘛？乖⋯⋯我地行啦⋯⋯」
「放開我呀！」盈盈睇穿咗媽媽一牽涉到婚姻就會扮可憐。呢一刻佢感到極度嘅噁心，奮力想從媽咪手中掙脫，連忙呼叫：「我唔會原諒你呀！係你報警拉咗阿祖！」
盈盈同媽咪當街爭執，開始引嚟途人圍觀。媽咪係名校嘅訓導主任，形象對佢來講好緊要。但係見住眼前呢個徹底變晒嘅乖女，媽咪唔只心痛，佢仲好驚⋯⋯好驚⋯⋯好驚——
「啪——！」
媽咪對離婚嘅恐懼令佢作出最自然嘅反應，驚到要兜巴車落盈盈塊面。
「黃梓盈！你癲完未？！」媽咪憤怒地咆哮，將多月以來嘅不滿統統於呢一刻爆發﹕「我已經畀左好大自由你﹗你話要冷靜一下，我畀你去Ada屋企住﹗你知唔知我⋯⋯我⋯⋯噫！」
媽咪心急到想喊，但礙於面子佢夾硬令自己唔流淚，換來嘅係劇烈嘅頭痛，話：「我用盡方法去說服你爸爸！同爸爸講你嬲我爺爺大壽嗰晚冚你一巴！說服爸爸你要時間冷靜！爸爸畀一個月時間我去氹返你！我⋯⋯我好攰啦！我真係好攰啦！但結果……你居然講大話呃我？你走去同個黑社會一齊﹗？我教出嚟嘅女，係唔會講大話架﹗你幾時變到咁壞架？我對你好失望呀﹗」
「我喺你心目中！我做每一件事你都睇唔順眼﹗我有畀心機做你地既乖女架﹗你同爸爸冇讚過我呀！點解要我去到離家出走呢一步你先識嚟彩我？因為……」盈盈抖住食指，又恨又心痛地講﹕「你根本唔係愛我！你亦都根本唔係關心我，你關心嘅係你自己嘅婚姻﹗你最驚係爸爸同你離婚﹗」
「……」媽咪被盈盈睇穿左內心，立時唔知要講啲咩。
「媽咪我真係好愛你架﹗我好憎爸爸有婚外情，我先要喺親戚揚晒爸爸嘅醜事﹗我唔鍾意爸爸咁對你呀！我咁愛你到最後得到啲咩？我換嚟嘅係畀你打畀你鬧﹗」
「……」
「我唔愛你啦﹗你根本就唔愛我﹗你最錫既係梓桓！你離婚唔關我事呀﹗」
「啪——！」
呢一巴，令盈盈面龐發痛，但佢唔知媽咪隻手同個心都好痛。呢一巴亦令氣氛又跌到一個更凍嘅冰點。
「喂，小姐，教女返屋企教啦。你當街咁樣打個女，我地好難做呀。」警員上前無奈地講。
媽咪用一雙充滿淚光既眼睛厲左個警員一眼，警員自知冇野好講就慢慢退開左。
此時有位女警埋去盈盈身邊耳語，勸佢再唔聽媽咪話返屋企就會報Missing，最後可能要法庭出兒童保護令，到時就更麻煩。
「返屋企。」
媽咪唔拖住盈盈，而盈盈亦都唔反抗只好從後跟實媽咪。就彷彿……媽咪依然係嗰個冷漠既媽咪，而盈盈依然都係嗰個聽媽咪話嘅盈盈。然而，有些改變就只有佢地先知。
「……我決定左……一到18歲……」
「我就走﹗」
「阿祖……對唔住……」
「你教我要原諒媽咪……」
「我做唔到……」