真人真事改篇﹕師生戀﹕《最接近的陌生距離》: Miss Wong特別篇﹕第一章﹕冷戰時……01
01
「Miss Wong⋯」
「Miss Wong⋯⋯⋯」
「Miss Wong !！」
「係！！」Miss Wong於白日夢中驚醒，回神嘅時候見到眼前有幾位年資深嘅老師好不滿咁望住佢。佢心下一驚，霎時間莫講話知要做啲乜，佢連自己而家身處喺邊都唔記得咗！
「黃梓盈！輪到你匯報啦。」中年嘅Miss Cheng不滿咁托一托眼鏡，嘴巴默默抖動，正係暗暗咁抱怨。
Miss Wong環望四周，見到好多不滿又不耐煩嘅眼神，令佢不安地吞咗啖口水，只感覺眼下環境既熟悉又陌生。此時Miss Wong 感覺手肘被人頂咗一下，正係新嚟嘅Pe阿Sir兼Miss Wong嘅好友李Sir （Alex) 輕聲地講：「我地講到去各班情況啦。到你嗰班啦。」
此時Miss Wong 先如夢初醒，原來佢正開緊級務會議，連忙地話：「Sorry！ 4A班情況大致冇問題。只係氣氛就有啲懶散，欠交功課都多。不過值得讚嘅係，謝子匡由上次家教會件事後，真係冇欠交功課同遲到啦。至於整班成績方面⋯⋯」
Miss Wong 雞手鴨腳咁拎出文件，臨急抱佛腳咁講出整班情況。講到咁上下時校長忽然插嘴，冷冷咁講：「我大概知架啦。按統測結果睇，4A班有一半同學跌緊落留班線，請你好好注意。嚟緊係上學期考試，我想Miss Wong你可以督促你嘅學生認真應付考試。」
校長邊執拾文件邊講：「我實在唔想破創校紀錄，成班都要留級！散會！」
眾教師紛紛離去，夾雜住議論嘅聲音，聾嘅都知係講緊Miss Wong。Miss Wong難受咁擰埋一面，深深地吸一口氣，感覺到每一口空氣都好冰冷咁難受。畢竟由開學到而家，佢嘅工作表都被受質疑。最後會議室只留下Miss Wong同李Sir。Miss Wong 神情落莫低頭，望住枱上佢打咗成晚嘅文件竟然變得陌生起嚟。只因為佢被腦中嘅事所影響⋯⋯
「啪——！」先係掌摑嘅聲音。
「離晒譜架！」然後係佢自己把聲：「講咗唔准打交呀！你係咪想打死杰少先安樂呀？」
之後佢腦海中見到一個令佢又愛又心痛又難過嘅面孔正在紅起雙眼、嘴巴抖動，一面委屈。此時，佢感到指縫間乃至掌心慢慢熱起嚟，由灼熱變成痛⋯⋯心痛⋯⋯Miss Wong自責，呢一巴實在唔應該摑落低B仔塊面度。就係呢一巴掌，將佢同謝子匡嘅關係摑到落冰點。最令Miss Wong難過嘅係，謝子匡當時只係緊張佢唔見咗份考試卷先至郁手打杰少。
「⋯⋯其實，如果我唔係佢老師⋯⋯我應該唔會搞到佢同杰少絕交⋯⋯」
師生戀唔單單係禁忌、身份上嘅差距，佢係謝子匡嘅老師、女朋友，亦都係男朋友班兄弟嘅老師。杰少就係一個例子，想喺佢地嘅關係中得到好處。
師生戀，令本來唔易做嘅教育工作變得更加難⋯⋯
Miss Wong已經令低B仔冇咗個好朋友，佢實在唔想⋯⋯佢低頭望仲滲緊血嘅爪痕，淚水於眼中打轉，默默咁講：「我唔想影響到你成長⋯⋯」
「你好唔掂喎。」李Sir擔心地問
Miss Wong回過神嚟，抹一抹眼淚，搖一搖頭，苦笑話：「還好啦。」
「咪死頂啦你。你睇下你隻手，你最近養咗貓嚟呀？」李Sir見到Miss Wong 手背嘅傷，半嘲笑咁慰問，其實佢好擔心呢位老友會頂唔順。
Miss Wong 嘆咗一口長氣，苦笑地講：「佢唔肯食藥嘛⋯⋯」
李Sir搖搖頭，無奈地話：「一場母女唔洗咁嘅。再者你都想照顧佢啫，佢唔領情都唔洗咁打你架？」
「咁⋯⋯係我唔啱嘛，係我搞到佢離婚⋯⋯佢憎我係應該。」
李Sir搖搖頭，無奈地話：「邊關你事呢？決定離婚嗰個係你爸爸喎。」
「係我⋯⋯只要我唔離家出走，唔任性，乖乖地做佢地嘅乖女，梓桓唔會有樣學樣跟住一齊走。而爸爸就唔會⋯⋯梓康亦都唔會⋯⋯⋯」
Miss Wong好似被負面情緒一直拖住走，只需要一個觸發點，佢情緒就會崩潰。
「喂喂喂⋯⋯死肥盈，定啲嚟先。」李Sir輕撫Miss Wong髮頂，輕輕將Miss Wong擰去正面望住自己：「你又嚟啦，邊個話做大家姐一定要攬晒啲責任架？」
「媽咪⋯⋯」Miss Wong哽咽，提起媽媽，佢內心嘅細路女性格又出返嚟。
「唉⋯⋯真係畀你激死！」李Sir輕輕敲一下佢頭頂，邊笑邊鬧：「不如你同你個低B仔坦白啦。佢係你男朋友，佢會同你分擔架嘛。」
「唔得呀。佢一定咩都攬晒上身架。我唔想影響佢成長。佢已經孭咗個大過，統測又唔合格，操行又差，而且嚟緊仲要考試⋯⋯」
「唉，得啦得啦！」李Sir無奈搖頭：「咁即係要我繼續食死貓啦？」
「Sorry⋯⋯」
「嗱，講明先呀，你個低B仔對我愈嚟愈冇禮貌呀！我遲早罰佢架啦！死肥盈！」
「唔准罰佢呀！」
「哼⋯⋯費事理你呀！我而家準備去買廢水飲⋯⋯」李Sir喺拎咗張台式飲品買一送一卷出嚟：「咦？原來我有買一送一喎，有冇興趣呀？」
「奶蓋⋯⋯」
「紅茶多甜呀嘛⋯⋯」
「加珍珠⋯⋯」
「死肥盈！」
「死八婆。」