精子is money: 第九十四章 小鹿亂撞

啪一聲，我一手拍走左個波，個波反彈落地慢慢碌走，此時，一個高大型男以慢步行過黎執返個波，佢帶住兇狠既眼神望住我，呢個時候坐係觀眾席既同學仔都望過黎。

「唔好意思。」由於有好多同學望住，藍佑龍原本兇狠既目光變得柔和。

「哼，唔緊要。」我冷笑一聲回應，一諗到之後要同呢個偽君子跑接力賽，個心入面真係有種不悅既感覺，我轉身插住褲袋離去。

「喂，唔睇啦？」阿花係我背後大嗌

「唔睇啦，你要睇既自己睇飽佢。」



「……」呢個時候阿花追上我既腳步行左埋黎。

「你做咩唔睇？」我問阿花

「無阿……咁岩我都唔想睇囉。」

「哦。」

「其實你覺得藍佑龍靚唔靚仔？」



「嗯……都幾靚仔既，做咩？」

「無呀，隨口問下姐，咁我呢？」

「下？你呀？」

「毒撚樣囉，哈哈。」阿花露出迷人既笑容

「唉，係咩……」



「其實……都唔差既。」
 
「……」我無出聲只係呆企係原地望住阿花。

「無事咁我返班房先。」阿花臉上無故泛起紅暈，隨後急急腳咁行走，遺留下孤單既我。



我仲未想返課室，唯有自己一個係校園散步，我漫無目的咁周圍行，直到我經過圖書館，我從圖書館門外既玻璃窗見到正低頭睇書既唐梓晴，咁岩唐梓晴抬起頭，我同佢既目光對望，互望左大約三秒中……

唐梓晴竟然向我揮手示意叫我入去。

「我？」我舉起食指指向自己，就好似唔相信眼前既事實，直到玻璃窗既另一邊既人向我微微點頭。

我只好帶住小鹿亂撞既心情走入圖書館，我推開門行入圖書館，隨即聞到書本既味道，老實說，我並唔鐘意睇書。



「嗨！咁岩既？黎睇書呀？」我望住眼前既美人兒嘗試搶先發話。

「午安，阿積。」

「搵我有事？」

「阿積你……最近成績好似唔係幾好咁啵，不如一齊溫書啦？」

「……！阿積？」我當堂嚇左跳，我仲以為自己第一句係聽錯，我難以掩飾心中那種愉快。

「係呀！李晶積嘛？咪阿積囉？定係你唔鐘意我叫你呢個名？」

「無，唔係呀！只係有ｄ意外姐，咁我應該叫你咩名？」



「梓晴同學？定係晴同學。」

「ｕｍ，你叫我梓晴得啦，唔洗加同學兩隻字咁見外。」女神露出甜蜜既笑容，唔知點解我個心有種微妙既感覺。