我嘅職業係專溝人地個女朋友: 4.2

 
「壞人你好，我叫Louis。我想同女朋友分手，可唔可以幫我?」
 
「原因?」
 
「可唔可以唔講?」
 
「得，不過咁你要搵其他人幫你。」
 
「… 咁我講啦… 」




 
「請講，洗耳恭聽。」
 
「因為…佢唔比我掂。」
 
「可唔可以講多少少?」








---Louis視覺---
 
我叫呂梓燊，英文名Louis。
 
由於我小學中學都一直喺男校返學，所以接觸女仔嘅機會唔多，都算係一個少少嘅毒男。
 
不過好彩，香港無一間大學係只收男生，所以當我入到大學，亦終於可以揮別過去唔駛再靠動作片去認識女性而係多左好多機會咁去真真正正接觸唔同真實嘅女性。
 
果陣，我對將來充滿住憧憬，滿懷期待自己應該好快就可以脫離A0，青頭仔同毒撚衣d讓人悲痛嘅身份。
 




因為選擇左住hall，仲係一間男女hall，果然我好快就遇到一個有感覺嘅女仔Maggie。
 
我地真正相識係因為我地喺hall嘅o-camp係同組組員。而佢第一次見我就主動撩我傾偈，又成日對住我笑，好快我就比佢所吸引有d迷上左佢。
 
然後我發現相對於內向怕醜唔太敢同女仔傾偈嘅我，Maggie嘅感覺就outgoing好多。佢好似好擅長同其他人溝通，同個個都可以好岩傾咁。
 
望住佢嬌少但迷人嘅外表，加上同其他所有人都可以好自然遊刃有餘咁傾偈，我估就係我同佢衣種咁大嘅反差令我好快就由留意佢變成左鍾意佢。
 
我決定我要努力令Maggie成為我第一個嘅女朋友!
 
不過零經驗又怕醜嘅我要追Maggie衣d咁受歡迎嘅女仔又談何容易?
 
所以我都只可以努力請教朋友同上網學下應該點樣去溝女。
 
但除左自身問題外，其實同時間我亦留意到除左我之外，至少有另外三個男仔對Maggie都有興趣，特別係果個狗公組爸，成日乘機對Maggie獻殷勤又扮晒唔覺意咁博佢慒…




 
望住佢地個個有外型又咁識同女仔傾偈氹佢歡心，成日都可以令Maggie開懷大笑，而我對住Maggie就成日講野都口窒窒好似野都唔識講咁，自卑嘅我覺得自己成功機率真係好低，好快都為自己打定輸數。
 
不過或者真係上天眷顧，皇天不負有心人，雖然我成日都會出現蝦碌情況，又好唔擅長同女仔溝通，但Maggie似乎都無嫌棄我，仲好願意比機會我，並無因為我嘅笨拙而睇我唔起落我閘。慢慢地我都開始進步可以同佢好自然傾偈之餘亦無再做咩柒事。
 
最後無諗過憑我嘅誠意竟然真係感動到佢肯答應做我女朋友。果刻我真係好開心完全無諗過自己竟然可以擊敗其他強敵成功追到Maggie返黎。