我嘅職業係專溝人地個女朋友: 6.13

當年當善柔同我講佢同左黎浩明一齊後，我首次意識到我地之間身份嘅微妙變化，我好可能再唔係佢最親近嘅一位異性。
 
心入面莫明奇妙咁有股燥動同不快，然後當我再遇見果個黎浩明果陣就越睇佢越覺得唔順眼，每次見到佢同善柔一齊，我個心都好唔舒服。
 
之後，我不自覺咁不時都會喺善柔面前講對方嘅壞話。
 
「其實佢份人真係好悶…同佢講笑都完全唔識笑，你平時點頂架?」
「喂，我見佢同第二個女仔傾偈喎!」
「真係唔明佢有咩好，成舊飯咁，替你辛苦呀…」
「你覺唔覺佢有少少似果d高分低能嘅人?」 




 
諗返當時，自己其實真係好小學雞。起初善柔對衣d說話都係一笑置之，但隨住我越講越多，又或者佢地感情變得越黎越好，善柔對我都開始越黎越不滿。
 
「李立仁，雖然唔知點解你咁唔鍾意浩明，但我希望你明白佢係我男朋友，無人會成日想聽到關於佢男朋友嘅壞話，仲要係出自我最好嘅朋友… 如果你再咁成日講佢不是，我真係會嬲你，甚至會開始唔想再見你… 所以…求下你，尊重下我，尊重下佢得唔得?」
 
無叫我做仁仁，代表善柔真係生氣。而事實上喺衣次之後，佢都無再叫過我做仁仁，亦代表住我地之間嘅關係，開始真真正正咁改變緊。
 
善柔已經講到出口，所以我心入面雖然不滿，但都無再講過黎生任何野，始終我聽到佢講話會開始唔想再見我我都真係會驚。不過同時間為左鬥氣，我唔再講黎生壞話之餘亦附帶直程唔再同善柔點講野，好似嬲左佢咁成日對佢愛理不理，結果我地因為咁就真係漸漸疏遠左。
 
當然衣d都只係為左無謂嘅面子同自尊，事實上我個心其實係好唔舒服好想同佢和好如初。




 
為左令自己唔再成日諗起佢，脫離衣種感覺，過左段時間後我就接受左個女仔追求同左佢一齊。而咁之後我同善柔慢慢又好似變返無事咁會傾返偈做返好朋友，但我知我地嘅關係同以前已經唔再係一樣。
 
就咁過左兩年幾嘅時間，我地都已經係大學三年級嘅學生。雖然女朋友我都換過兩個，但我同善柔都算係已經完全適應晒大家衣種新嘅關係。
 
然後有一日，我喺街竟然見到黎浩明拖住左另一個女仔好似好開心咁。