我嘅職業係專溝人地個女朋友: 6.14

因為善柔知我唔鍾意黎浩明所以衣兩年幾其實我地都近乎無真係三個人咁碰頭，估唔到咁耐無見一見返佢就見到d咁嘅野。
 
不過當時嘅我並無嬲反而係心頭一喜，因為之前善柔成日話我中傷同誣衊佢，但今次我親眼所見有晒証據，咁佢應該無話可說喇掛?
 
可能你會問點解見到衣個畫面我竟然係開心而完全無替善柔生氣或者擔心。
 
你不妨試諗下如果你一直覺得你有個朋友嘅另一半好差唔係一個良配但你朋友一直唔信你仲叫你唔好再詆毀佢，然後有一日你搵到証據証明朋友嘅另一半真係有問題唔係一個好人果陣，你會有咩感覺?
 
我估比起因為証明到自己係岩而開心，更多其實係因為覺得朋友終於可以認清衣個人嘅真面目脫苦海唔駛再同個衰人一齊而開心。
 




而當時嘅我一直都覺得黎浩明對善柔黎講唔係一個好嘅對象 。雖然衣種觀感可能只係因為自己對對方嘅妒忌而更加扭曲左佢嘅人品同性格，但當時嘅我唔會咁諗而之後嘅事實亦証明左我係正確。
 
(竟然為左自己終於可以吐一口烏氣而開心，原來過左咁耐我都仲係為當日嘅事而介懷…)
 
當時嘅我只係自私又幼稚地咁諗。
 
 
果晚我就即刻去左同善柔講自己見到d乜。
 
 




「鄺善柔，我今日見到你條仔拖住第二個女仔行街呀~」我帶住點招積同幸災樂禍嘅語氣同佢講。
 
「…」但善柔只係望住我並無比反應我。
 
「做咩唔出聲? 受左太大打擊?」我係佢面前揚揚手。
 
「李立仁，我以為過左咁耐你已經唔會再咁做，點知衣家又黎? 你唔累架咩?」善柔一副失望嘅樣子責備我。
 
「你… 唔信我?」我無諗過善柔會唔信我。 衣兩三年係咪原來已經將我地以前儲左十幾二十年嘅感情都掏空左?
 




「你之前已經成日講佢壞話，咁叫我點信你呀?」善柔嘅聲線越黎越高。
 
「今次係真架… 我真係見到!」見自己反而被誤會成講大話果個我焦急咁講。
 
「你仲有無其他野想同我講?」但善柔似乎已經認定我係講大話。
 
「無喇…」見佢咁嘅樣同語氣我唔知仲可以講咩。
 
「咁你冷靜完再有其他野先搵我啦。」然後善柔就無再理我自己返左屋企。
 
 
曾經，我以為只要我唔爭取去擁有咁我就唔會失去，
 
但原來就算唔擁有嘅話其實都一樣可以失去。
 




我同善柔，應該以後都無可能可以返返去之前咁吧…