我嘅職業係專溝人地個女朋友: 9.7

好細個果陣曾經有次假日因為媽咪帶左仲係好年幼嘅善潼去左參加個同學聚會，鄺生又突然要加班，所以就將鄺善柔暫時寄放左喺李立仁屋企等李太幫手睇住佢。因為果日李立仁一早就跟左佢父親出去玩，所以就得返鄺善柔同李太兩個人留喺屋企。
 
不過過左無耐李太突然收到電話有急事要拎一拎d野比個親戚，無辦法下李太就帶埋鄺善柔搭車出去搵個親戚。
 
比完野親戚諗住返屋企果陣，行行下李太咁岩撞到個好耐無見嘅同學就企左係度同朋友閒談，而鄺善柔因為悶又見到遠處有間玩具鋪好似好吸引，於是貪玩嘅佢就襯李太同朋友唔為意果陣靜靜雞咁離開走左去果間玩具鋪。佢諗住佢地應該仲有排傾，自己只係行開一陣行完再返返黎搵佢地應該都無咩問題。
 
點知佢睇睇下就唔知時間，而當佢終於睇完心滿意足咁再返返去原本果度搵李太嘅時候就發現唔見左李太同佢個朋友。
 
佢嘗試周圍喺附近睇下會唔會搵得返李太，但因為人生路不熟自己再行行下就直程完全迷失左路。
 




越行鄺善柔就越驚，然後當佢見到街邊有個電話亭佢就即刻衝左入去。因為之前鄺生鄺太同佢講過如果有日喺街迷左路就搵電話亭打電話，可以試下打返自己屋企，李立仁屋企或者鄺生公司求救。
 
李立仁屋企當然無人聽，但佢不斷打去鄺生公司同自己屋企亦同樣無人聽。打左幾十次後都無人聽鄺善柔終於絕望咁放棄，然後就喺電話亭走返出黎繼續亂咁行希望搵得返李太。
 
陌生嘅環境加上連唯一識嘅求救方法都失敗左，鄺善柔越黎越驚，然後開始忍唔住喺街一邊亂行一邊喊起上黎…
 
佢好驚以後都見唔返自己父母，李太同李立仁，好驚從此自己要一個人留落街頭然後餓死…
 
好彩佢嘅喊聲吸引到途人注意，而同時間李太發覺唔見左鄺善柔後亦同友人不斷咁搵緊鄺善柔，所以最後先終於搵得返佢平安無事。