我無啦啦同隻芝娃娃交換咗身體，跟住無啦啦又遇上喪屍大爆發: （8）

個阿叔「啊」一吓嗌咗出聲，我就繼續死咬住佢唔放。

「屌你老母死衰狗！」

條友嬲到出煙，見我唔肯鬆口，就將計就計遞高隻手，撼我個頭上車底盤。

每一吓都砰砰聲，我好快就頂唔順，被迫鬆開口。

跟住個阿叔趁機會大大力一腳𨅝我走。





我連滾帶翻碌出車底，一路碌到去一隻喪屍嘅腳邊。

「BB…你…你返嚟啦…」呢把聲熟口熟面。

岳高頭一睇，竟然係嗰個師奶。

乜原來佢未死，仲變咗喪屍？！

要分辨人同喪屍其實好簡單，喪屍嘅皮膚白到無血色，且青筋突顯，身上通常都會有被咬過嘅傷痕。





個師奶有齊曬以上特徵，好明顯就係一隻喪屍。

「BB…知唔知…亂咁走…好危險…」佢隨即露出兇相，伸手想捉我。

我二話不說，馬上轉身逃跑，但唔知點解，跑極都係停留喺原地？

於是我擰轉面睇吓…

Oh Shit！原來我條尾俾條八婆踩住咗！





「BB…你…又想走？」對方捉住我頭同後腳，然後雙手抱起我。

「想點呀你？我係你BB嚟架喎，你唔係想傷害我吓話？」我一邊講一邊奮力掙扎。

「你太曳…今日…我要…懲罰你…」對方張開血盆大口想咬我。

情急下，我無其他辦法，只能用力咬佢隻手，希望佢會鬆開手。

但係，我咬到佢隻手出血咁滯，佢都係一啲反應都無，好似完全唔覺得痛咁。

反抗失敗嘅我，猶如砧板上嘅肥豬肉，任人宰割。

最後我個背脊俾個師奶用力咬咗一啖。

我先係痛咗一吓，然後覺得有啲暈坨坨，兼且打咗個冷震…





咦…呢種反應似曾相識…