我無啦啦同隻芝娃娃交換咗身體，跟住無啦啦又遇上喪屍大爆發: （9）

大約五秒後，頭暈嘅感覺漸漸消失。

本來朦查查嘅視線突然變返清晰，但上下同時多咗兩條黑框，感覺好似本來睇緊4:3嘅熒幕，忽然變咗16:9。

隨即我見到自己手上，捧住一隻受傷流血嘅芝娃娃。

我打咗個突，嚇咗一跳，拿拿臨放返隻狗落地下。

從啱先身體似曾相識嘅反應，到呢刻眼前嘅畫面，種種跡象都顯示，我再次同人交換咗身體。





莫非係同個師奶換咗？？？

為咗事實求證，我踏前兩步，行到部私家車嘅車窗玻璃前。

從倒影之中，我見到一個皮膚蒼白、嘴角帶血嘅中年婦人。

果然係咁！

啱啱個師奶咬落嚟嗰吓，我同佢調換咗身體，情況就好似之前隻芝娃娃咬我嗰陣咁。





換句話講，依家嘅我變咗一個師奶，除此之外，我仲係一隻喪屍…

嘩屌！我實在無辦法相信！

我無辦法相信，自己竟然會變成喪屍！

對住塊車窗玻璃，我仔細咁再打量自己一次。

雖然我心入面極唔情願相信，但係事實卻擺在眼前。





個師奶的確係喪屍，而我又的確同佢交換咗身體，所以我依家毋容置疑就係一隻喪屍！

「Raughhh！」我不自控咁發出喪屍嘅咆哮。

我嘅內心受到極大嘅衝擊，只不過同時之間，口腔卻又嘗到一種可口嘅甜味。

頭先個師奶咬咗隻狗一啖，個嘴仍留有鮮血。

而口腔呢一浸甜味，正正就係嚟自呢啲鮮血…

點解會咁嘅？啲血嘅味道好香、好甜、好特別，係任何一隻糖都俾唔到嘅甜味。

莫非變咗喪屍之後，連味覺都會改變？

我用舌尖再舔一舔嘴角邊嘅鮮血…





啲血真係好香甜…好好味…好想再要多啲…多啲…