我無啦啦同隻芝娃娃交換咗身體，跟住無啦啦又遇上喪屍大爆發: （11）

我回答對方話：「因為…Raughhh…我同你…你交換咗…Raughhh…身…身體…」

變成喪屍，唔單止會改變味覺、嗅覺及視覺，而且會影響喉嚨發聲，導致講野嘅時候甩甩咳咳。

至於中間嗰啲「Raughhh」呢，上面都解釋過，就係身體好想食人而產生嘅生理反應。

「咩…咩話?」個師奶聽完我解釋，碌大雙眼，露出驚訝嘅表情。

身體交換呢啲咁離奇嘅事，確實係比較難以置信。





然而根據前後兩次經驗，身體交換嘅觸發條件，應該就係我要被咬。

因此，我同個師奶講：「如果…想交換返…Raughhh…身體…可能你…要…Raughhh…咬返我…」

我之所以提出咁樣嘅提議，並非想做狗，最主要係想測試吓自己嘅推斷有無錯。

假如被咬之後，身體真係再調返轉嘅話，咁就代表我估得無錯。

到時有機會遇見返自己嘅身體，咁只要俾佢咬一啖，我就可以重奪屬於自己嘅肉體。





當然，我好希望佢唔係因為變成喪屍而咬我。

「嚟…咬我啦…」我企定定叫個師奶咬返我。

對方注視咗我幾秒後，向前一跳，結果佢無咬我，而係擔走咗我手上嘅斷掌。

「喂…我叫你…咬我…」

條友一味掛住𡁻隻手掌，完全無視我嘅說話。





見佢食到舔舔脷，搞到我都好想咬返啖：「Raughhh！」

隻狗察覺到我好似想分返一份，拿拿臨就擔走隻手掌，匿入車底自私食。

至於嗰個阿叔則早就俾其他喪屍分咗嚟食。

望住佢地食得咁滋味，我嘅心情十分複雜。

一方面覺得殘忍，另一方面又覺得好羨慕好妒忌，好想食埋一份。