我無啦啦同隻芝娃娃交換咗身體，跟住無啦啦又遇上喪屍大爆發: （12）

呢個鐘數，太陽已經落咗山。入夜後路邊只有一排街燈著咗。

就喺昏昏黃黃嘅馬路上，有個人影從遠處行過嚟。

飄逸嘅長髮，魁梧嘅身材，以及手上一把大關刀。

呢個人正是「柴灣關公」！

我估大家應該都唔知佢咩料，所以好簡單咁介紹一吓：





大概兩三年前，呢條柴灣友單拖拎住把大關刀，當街當巷喺度舞，聲稱要同網民約戰兼當面對質。

單嘢當時都有傳媒報導，假如想進一步了解，只要去google搜尋「柴灣關公」，就會搵到相關新聞。

假如你係柴灣街坊，咁應該間唔中都會喺柴灣見過呢個人。

畢竟佢一身長頭髮鬍鬚背心look，就好似漆黑中嘅螢火蟲咁搶眼。

「你呢班烏合之眾聽撚住！我唔理你地係high撚大咗，定係黐q咗線，總之你地喺柴灣搗亂，我就要對付你地！邊撚個都無情講！」





「柴灣關公」講完一輪嘢，跟住就「馮馮馮」咁舞咗幾吓關刀，每一吓都有板有眼，睇嚟條友有啲料到。

「Raughhh！！！」

我身邊一眾喪屍，包括變咗芝娃娃嘅師奶，見到咁大個人送上門，都唔理得佢關公定劉備，總之就湧上去噬佢。

出於喪屍嘅本能，我忍唔住都湧埋一份。

面對一班喪屍圍攻，「柴灣關公」怒哼一聲，揮刀出擊。





「我斬！我劈！我捅！」

勢估唔到，呢條友真係如有「關公」附身，橫劈、豎斬、甚至三百六十度劈殺，都完全難佢唔到。

沉重又鋒利嘅大關刀，喺佢手上揮灑自如，逐一將埋身嘅喪屍斬手斬腳，連狗都唔放過。

一見到唔對路，我第一時間就調頭走。

「哼！想走？」「柴灣關公」一刀劈埋嚟。

我反應已經好迅速，可惜轉身嗰吓都係轉慢咗半拍。

面前隨即刀光一閃，個肚打橫被劏咗一刀。

痛就唔覺得好痛，只不過肚入面啲腸就跌曬出嚟。





「再嚟一招收你皮！」對方想再補多一刀。

我唔理三七廿一，一邊塞返啲腸入個肚，一邊亡命狂奔。