頂!傻咗咩!我點可以食「自己」?就算係咬都係佢咬我!

或者俾佢咬完,我就可以交換返個身體返嚟!

於是我扮作師奶嘅聲線同口吻命令佢:「BB…快啲嚟…咬我…」

「亞狗」擰轉面,露出疑惑嘅表情,好似係諗緊點解我要佢咬我。

大約過咗兩秒,佢搖一搖頭,好似表示佢唔會咬自己嘅主人,然後將個頭擰返轉,面對返住個四眼仔。





「你再唔走開,佢一定會咬你!」四眼仔警告。

「汪!」「亞狗」都係唔肯走。

好香!佢身上浸味真係又香又甜!好想咬落去!

唔得!呢個身體係我架,唔可以咬架!

唔係喎!既然身體係我嘅,咁咬落去都係傷害自己,都無傷害到其他人!





餓咗咁耐,我真係好想好想好想食一啖人肉!

哪怕只係一啖都好!

「Raughhh!!!」

強烈嘅本能慾望衝昏咗我嘅頭腦,我擘大咗個口,想一啖咬落去「亞狗」條頸度。

「小心!」個四眼仔即刻一手拉開「汪汪」。





雙唇一合,我棚牙咬唔到人肉,只食到空氣。

「你見到啦!佢已經失去咗常性,頭先爭啲連你都咬埋!」

四眼仔一講完,跟手就揸住電鋸向我衝埋嚟。

我已經立即退後,可惜反應都係慢咗半拍,對方伸手向前一插,將成把電鋸隊咗入我個肚。

「滋滋滋滋滋——」

鋒利嘅鋸齒喺我肚入面快速轉動,鋸到我啲腸以及其他內臟皮開肉綻。

大量肉碎同血汁彈到個四眼仔一面都係。

雖然感受唔到好大嘅痛楚,但再咁落去,我隨時都會無命!