啱先我地又同喪屍鬥力又跳窗,經歷完一大輪嘢,大家啲體力基本上所剩無幾。

仲要啲喪屍餓到發曬狂,吓吓都飛撲埋嚟想撞低人。

就算依家只係面對十隻喪屍,但我地一樣應付得好吃力。

「救我呀!」最弱雞嘅阿明俾三隻喪屍撲跌,大叫救命。

Irene俾四、五隻喪屍擋住,無辦法去救佢,我身邊嘅喪屍比較少,先掃跌前面兩隻喪屍,跟住就衝去幫阿明解圍。





我全速奔跑,利用助跑嘅衝力跳起,一腳飛踢將圍住阿明嘅三隻喪屍踢開。

「次次都要人幫,真係服咗你!」我伸手拉返起阿明。

而嗰三隻喪屍好快又再圍埋嚟,佢地其中一個係著軍裝嘅差佬,腰間掛住一支配槍。

「不如我地博一鋪,我去捉住個差佬,你去搶佢支槍。」我同阿明講。

「咁其餘嗰兩隻呢?」





「一人一腳踢走佢地!」

我將鐵通攝入條褲,然後數三聲同阿明一齊跑過去,起腳踢向差佬旁邊兩隻喪屍。

我一腳踢中心口,隻喪屍即刻向後仆低,隨即我從後捉住隔籬嗰隻差佬喪屍:「阿明!郁手啦!」

殊不知阿明真係無用,一起腳就俾喪屍捉住隻腳,依家走唔甩,幫唔到手不得止,仲反過嚟嗌救命。

搶槍要緊,我理唔到佢住。





之後我夾硬用一隻手捉住差佬兩隻手,另一隻手就攞腰間嗰支槍。

個差佬個身猛咁擰左擰右想反抗,我要谷恆全身嘅力,先勉強用單手捉住對方雙手。

下一步,我另一隻手就伸到佢嘅腰間,揭開槍袋…

「Raughhh!!!」

個差佬突然發力,雙手衝破我雙手嘅鉗制,擰轉身對我張開血盆大口。

「砰!」

好在喺佢轉身嗰吓,我及時攞到支槍,而又及時喺佢咬埋嚟之前,向住佢額頭開咗一槍。

一秒之後,個差佬就應聲倒下。





headshot果然係對付喪屍最有用嘅方法。

「救我呀救我呀!」俾喪屍捉住隻腳嘅阿明大聲呼叫。

條友啱先喺車頂俾喪屍剝咗條褲,家陣下半身赤裸,隻腳一抬高,「細佬」就露曬出嚟。

我行前幾步,對住嗰隻喪屍個頭又開一槍。

南亞仔對眼無近視,睇嘢好清楚,令我可以準確瞄準,一嘢就爆頭。

我地兩個算係搞掂左一半喪屍,相反喺另一邊廂,Irene俾班喪屍逼到埋墻,情況極度危險。