我無啦啦同隻芝娃娃交換咗身體，跟住無啦啦又遇上喪屍大爆發: （56）

我同阿明拿拿臨跑過去。

我對住嗰班喪屍嘅後腦，連開五槍：「砰！砰！砰！砰！砰！」

五隻喪屍嘅後尾枕中槍爆血，並逐一倒下。

「你無事呀嘛？」阿明好緊張Irene我。

「無事，不過點解你大髀有血嘅？」Irene反過嚟睄到阿明大髀內側有血。





阿明下半身無著褲，僅僅用身上件衫遮住下體。

我向下望一眼，發現真係有血：「真係有血！你頭先俾喪屍咬咗？咬咗邊度？大髀？」

「Er…Er…」

Irene見阿明口窒窒，於是突然一手拉高對方件衫。

阿明想遮但遮唔切，我地見到佢真係俾喪屍咬咗一啖。





不過咬嘅地方唔係大髀內側，而係蛋蛋。

再準確啲講，係右邊蛋蛋，傷口好明顯流緊血。

「快啲坐低！」Irene將阿明推落地下，跟手搶走埋佢手上嘅斧頭。

「你…你想…想做咩呀？」阿明感到驚慌。

「如果唔想啲喪屍病毒滲透你全身，依家最好嘅方法就係切咗你粒睪丸！」





「咩...咩話？」

「你唔想變喪屍，就要切蛋蛋！」Irene表情非常認真，一啲都唔似講笑。

然後佢擰轉面同我講：「麻煩你幫我捉實佢，㩒住佢膊頭唔好俾佢郁。」

作為男人，我完全想象到切睪丸係有幾痛，但係如果唔咁做，咁阿明就會變喪屍。

因此，我只能聽Irene講，雙手壓住阿明兩邊膊頭。

「Irene唔好呀！我唔想變少粒丸！」阿明起勢咁掙扎。

「再捉實啲！」Irene對我講。

「係！」我使出全身嘅力，加埋自身嘅體重㩒住阿明，同時擰歪面唔敢望。





「唔好！唔好！」阿明狂嗌唔好。

「忍一忍！唔會有事架！」Irene手起刀落，雙手舉起斧頭，一吓劈落去。

「啊！！！！！！！」阿明嗌到拆天。

我下面碌嘢都忍唔住縮咗一縮。

阿明右邊粒睪丸成粒切開咗，雙丸變成單丸。

Irene放低斧頭，喺自己件衫撕開一塊布，踎低幫阿明包紮傷口。

「我…我係咪...變咗太監？」阿明個樣灰到爆。





「放心啦，得返一粒都仲係男人嚟。」Irene幫阿明包紮好之後，就扶返佢起身。

喪屍塊面係白色，阿明個樣只係灰色，即係話佢無變到喪屍。

然而，由於個傷口就喺大髀內側隔籬，所以阿明一行路就會痛。

有見及此，肌肉佬Irene就主動孭起阿明。

「喂！估唔到你都幾重。」

「係咩？少少啦。」有得俾心上人孭住咁行，阿明好快就變得無咁灰，臉上更流露幸福嘅表情。

「咩嘢咁硬嘅？你扯旗呀？」

阿明尷尬一笑：「呵呵，好彩仲扯到。」