我無啦啦同隻芝娃娃交換咗身體，跟住無啦啦又遇上喪屍大爆發: （58）

當雙眼完全合上，徹底失去意識嘅前一秒，身體忽然顫抖。

大約過咗五秒，我再次恢復返意識。

我見到自己仲未上天堂，仍然係喺個海入面，而且多咗好多隻手。

係八爪魚嘅手！

我…我…變咗八爪魚？





乜原來八爪魚都會咬人！

此刻軟淋淋嘅身體，隨住水流喺海中漂浮，至於本來南亞仔嗰副身體，就慢慢沉沒喺海底深處。

咁都死唔去，睇嚟我都算命大，不過變成八爪魚，往後嘅人生就名副其實只能「隨波逐流」。

我一路漂浮，漂吓漂吓，忽然有個身穿一身潛水裝備嘅蛙人，游埋嚟對住我撒開捕漁網。

漁網一瞬間打開，由四方八方包圍我。





下一秒，蛙人一收網，就將我原隻捕獲。

成個過程好快，我都未完全反應過嚟，就已經被捉走。

個蛙人除咗捉咗我呢條八爪魚之外，喺佢手上仲有其他魚護。

我以為佢就會帶我地上岸，點知條友居然唔係向上游，反而係向下潛。

我心諗條友究竟想帶我去邊？





佢一路潛到落海底，隨即喺海底地殼上，突然中間出現一道裂縫。

驟眼睇以為係地裂，實際卻係一道隱藏喺海底嘅暗門打開咗。

呢道門通往嘅係一個神秘嘅海底基地。

最衰我被困喺漁網度郁唔到，亦無辦法睇清基地嘅全貌。

喺視線能及嘅範圍，我只見到冷冰冰嘅灰色墻身，以及走廊嘅白色階磚。

間唔中亦會有啲著住藍色制服嘅人經過。

捉住我嗰個嘅蛙人帶住手上魚獲，嚟到一個相信係廚房嘅地方。

佢除咗潛水衣，換上藍色制服。





隨後佢將其他魚放入水缸，唯獨係將我放入鋅盤，並且打開水龍頭，用水猛咁沖洗我。

條友似係想沖乾淨我，之後就煮咗我嚟食。

然而經歷過兩次死過返生，我覺得自己到呢刻仲生存緊，其實算係賺咗。

因此，我呢刻嘅內心並無因死亡而感到十分懼怕。

條友幫我沖完身，洗到白白淨淨，再將我放到一隻碟上，並用辣椒、蒜頭同醋嚟醃我，揦到我縮埋一舊。

當我以為自己被醃好，準備落鑊煎炒燜焗嘅時候，嗰條友竟然就咁冚蓋，兼托起隻碟拎起我。