我無啦啦同隻芝娃娃交換咗身體，跟住無啦啦又遇上喪屍大爆發: （57）

再行多二百米，我地就嚟到碼頭。

岸邊停泊咗唔同嘅船隻，有快艇、捕魚船以及躉船。

躉船通常固定喺岸邊，照計揸唔走，咁選擇就得返「大飛」或者捕魚船。

我地先上一架「大飛」，嘗試撻著佢。

我地三個人入面，無一個人識得揸船。





阿明撻唔著就俾我試，我撻唔著就Irene嚟試，我地三個輪流搞咗一論，用盡方法都啟動唔到部快艇。

過咗一陣，十幾二十隻喪屍聞到我地浸味，陸續行入嚟碼頭。

既然架快艇撻唔著，我地被迫棄船返上岸，之後再登上隔籬嗰架捕魚船。

結果一上到漁船，甲板有一隻帶漁夫帽嘅喪屍撲過嚟。

我地三個分工合作，我對付喪屍，Irene就孭住阿明去駕駛室。





「砰！」我開槍對付喪屍。

然而船艙內無燈，光線昏暗，令我難以瞄準。

射咗幾吓我都射唔中隻喪屍個頭，支槍仲要好快無曬子彈。

既然係咁，我唯有攞返支鐵通出嚟同對方肉搏。

「點呀？搵唔搵到方法開船？」我一邊揮動鐵通，一邊大聲問駕駛室嘅二人。





「研究緊！俾啲時間！」阿明大聲答我。

我手上嘅鐵通，對住喪屍個頭狂毆，一路就逼到佢出返甲板。

最後，我用棍向前一捅，將對方直接捅落海。

然而打敗咗一隻，仲有好多隻想湧上船。

我塞喺船艙嘅門口，一有喪屍想上船，就用鐵通打走佢，又或者伸隻腳踢佢走。

「開到船未？」我再問阿明同Irene。

「仲未得！」阿明答我。

「快啲啦！我頂唔到好耐架渣！」啲喪屍一隻接一隻，我嘅體力就快到達極限。





又過咗五分鐘，我開始手軟腳軟：「我真係唔得啦！快啲開船！」

呢頭講完，架船終於響起引擎聲。

Irene興奮大叫：「得啦！開到船啦！」

架捕魚船跟住就慢慢駛嚟岸邊，而我亦都卒之可以鬆一口氣。

喺阿明同Irene嘅操作下，架船離開碼頭，向住遠處駛去。

茫茫大海，終於唔再見到喪屍，筋疲力盡嘅我坐喺船艙內休息。

喺海上面大約漂咗十五分鐘，忽然喺傳嚟一浸燶味，而且仲有啲煙飄入嚟船艙。





我發現唔對路，立即順住啲煙行去船尾。

仆佢個街！船尾個引擎突然著火！仲燒到hum hum聲，啲黑煙係咁升上嚟。

「阿明！Irene！架船著火！」

「咩話？」

「引擎著火呀！唔信出嚟睇吓！」

一聽到我嗌，二人隨即行出駕駛室。

至於啲火就越嚟越大，咁嘅情況睇怕似係引擎過熱，導致著火。

假如真係引擎過熱，咁豈不是有可能爆炸？





呢個時候，Irene孭住阿明行緊過嚟船尾，我就拿拿臨調頭走，仲叫佢地唔好埋嚟。

「Boom！！！！！」

下一秒，成架船真係爆炸！

我地三個人無一倖免，全部被炸飛，並一一跌落海。

爆炸嗰刻，我最靠近引擎，因此炸得好應，左手同左腳都炸到爛咗，變得血肉模糊。

跌咗落海之後，我連掙扎嘅能力都無，只能一直向下沉。

海水十分渾濁，我見唔到Irene同阿明佢地。





世事真係難料，邊個會估到喪屍咬我地唔死，上咗船當以為安全嘅時候，居然會遇上引擎過熱大爆炸。

又鹹又臭嘅海水不斷湧入口同鼻，我開始抖唔到氣，腦入面再次出現人生走馬燈。

第一次出現嘅時候，我係隻垂死嘅喪屍。

呢一次，我係一個就嚟浸死嘅南亞仔。

瀕死之際，我又諗返起人生最大嘅憾事——溝唔到心愛嘅女神。

我發覺自己真係個好專一長情嘅男人，到依家個心都仲惦掛住女神。

可惜長情同專一係無用，個樣要係鬼佬先有用。

計落南亞仔都算係鬼佬，唔知女神見到依家呢個嘅我，會唔會動心呢？

隨住意識越來越薄弱，腦中女神嘅模樣漸漸變得模糊不清……

眼皮十分沉重，我一直向下沉、向下沉，似乎好快就要喺呢片大海之中，永遠沉睡。