「波士!」

一個梳油頭嘅男人行到我面前,相信呢個人就係主任。

「波士,你做乜呆咗咁嘅,係咪八爪魚唔啱食?」

「……」我含住隻八爪魚,出唔到聲。

口腔內,八爪魚嗰種又滑又潺嘅口感令人反胃,而且佢啲爪仲郁緊。





我頂唔順,直接成隻嘢lur返出嚟。

「波士,水呀!」油頭仔好醒目,拿拿臨遞咗一杯水俾我。

佢身上著住藍色嘅風摟,反觀我就著住整齊嘅黑色西裝。

我飲啖水𠺘一𠺘口,跟住見到隻碟上面隻八爪魚,居然仲識得郁。

估唔到八爪魚嘅生命力都幾頑強,俾人咬咗啖,汁都標埋,但咁都仲未死。





佢全身白賴晒又滑潺潺,望落核核突突咁,齋睇都有少少反胃,於是我拎返個蓋冚住佢,費事眼冤。

至於個油頭仔就叫返捉八爪魚嗰條友入嚟。

喺海入面捉我返嚟,兼擺我上檯嗰條友,真人係一個哨牙仔,佢身上同樣著住藍色嘅風摟。

睇嚟藍色風摟就係基地入面啲人嘅制服。

喺制服上面有一個logo,望落似一隻海龜。





我覺得個logo有啲熟口面,印象中唔知喺邊度見過。

「波士,你搵我有事?」哨牙仔問。

「喂!你點做嘢架!碟嘢咁難食你都擺上檯!」我都未出聲,身邊嘅油頭仔就狐假虎威,搶先開口。

「難食?無理由架,我明明照住波士平時嘅口味整架喎。」

「哎呀!話你仲駁嘴!快啲同波士say sorry啦!」油頭仔語氣有啲惡。

哨牙仔dup低頭,戰戰兢兢咁行埋嚟向我鞠躬致歉:「對唔住波士,係我錯,係我整得唔好食,對唔住。」

無啦啦有個人走埋嚟九十度鞠躬向我道歉,霎時間都唔知俾咩反應好。

結果我無出聲,佢地兩個又唔出聲,兼且表情嚴肅咁望住我,令氣氛變得有啲尷尬。





為咗緩解呢刻嘅氣氛,我唯有就話:「無事無事,係我今日無乜胃口啫。」

下一秒,油頭仔同哨牙仔好驚訝,碌大雙眼啤住我。

我眨一眨眼,心諗唔同我講錯嘢?

屌!係喎!我家吓上咗個韓國佬身,應該要講韓文至係。

「波士,你頭先同我地講中文?」油頭仔表情依然驚訝。

我拿拿臨扮嘢咳兩聲,跟住亂講一通,扮講韓文:「三三車快樂 mida…原爾岸杯 寵mida…」

只要求其lur啲字出嚟,再喺後面加上「mida」或者「寵」,咁成句聽落就會好似韓文。





油頭仔同哨牙仔嘅表情,慢慢由驚訝變成疑惑。