我無啦啦同隻芝娃娃交換咗身體，跟住無啦啦又遇上喪屍大爆發: （61）

我繼續一輪嘴鳩噏：「秋波多結衣 寵寵… 尾一郎田榮 mida…」

「啊！我知啦！波士你話唔係八爪魚唔好食，只係你今日胃口唔好，啱唔啱呀？」

油頭仔重複我頭先句中文，然後喺度扮聽得明我嘅說話。

呢條友咁識do，我就梗係打蛇隨棍上，點點頭表示自己就係咁嘅意思。

哨牙仔鬆一口氣：「哦~原來係咁~波士你唔怪我就好啦！」





「波士大人有大量，點會怪你呢！無乜嘢你就返出去啦。」油頭仔打發哨牙仔走。

同一時候，我就望一望周圍，觀察一吓呢度嘅環境。

呢間會議室面積唔算大，大約得兩百呎，中央位置放咗一張長檯，面向一塊投影screen，四面墻身色調都係冰冷嘅銀灰色。

成張檯得一張櫈，就係我坐緊嗰張。

過咗一陣，門外突然有嘈吵嘅聲音：





「你鬼鬼鼠鼠喺度做咩！呢度唔係你呢啲低級職員嚟得架喎！」

「Sorry Sorry。」

油頭仔第一時間開門睇吓咩事：「有咩事咁嘈呀？」

結果門一打開，我見到一個好熟悉嘅身影。

熟悉到我朝思暮想都想同佢交換身體。





無錯！呢度講緊嘅就係嗰個溝走我女神嘅鬼佬。

我起身快步行去門口，近距離再望清楚一啲。

條鬼佬成個「美國隊長」咁款，又型又大隻，所以我好肯定無睇錯！真係佢！

好奇怪？點解佢會出現喺呢度嘅？

「波士，呢條友唔識規矩亂咁走！」油頭仔對我講，「你放心，我地必定會嚴肅處理！」

我無理佢，直接上前問個鬼佬：「Why are you here？Where is your girlfriend？」

「My girlfriend？波士，你識我女朋友？」條鬼佬原來識中文，但就有好重嘅口音。

我心急起上嚟，直接用中文問佢：「係呀，我問你女朋友喺邊？同埋點解你又會喺度？」





我一講完，眾人又露出驚訝嘅表情。

油頭仔又問我：「波士你頭先同我地講中文？」

「Er…有…有咩問題？」我心諗今次大獲，一時口快又講咗中文。

「無問題，梗係無問題啦！波士你之前從來唔會同我地講中文，依家肯紓尊降貴同我地講中文，我地求之不得啦！」

呢個油頭仔都幾識擦鞋，咁都幫我兜到。

於是我就接住佢嘅說話講：「我諗住同大家一齊講中文，拉近吓彼此距離咁啫。」

「哈哈，估唔到波士你原來咁親民！」油頭仔繼續落足鞋油擦鞋。





本來我再想追問個鬼佬，殊不知突然又有事發生。

有兩個蛙人分別孭住兩個昏迷嘅男人行過嚟。