我無啦啦同隻芝娃娃交換咗身體，跟住無啦啦又遇上喪屍大爆發: （66）

聯合國鬼佬講完呢句，跟住有另一個鬼佬有型有款咁行入會議室。

佢之所以行得咁有型，全因佢個樣生得好型，成個「美國隊長」咁樣。

講到呢度，我諗大家已經知呢個鬼佬係邊一個。

無錯！佢就係嗰個溝咗我女神嘅鬼佬！

「仆街！原來真係有二五仔！」





油頭仔嬲到握起拳頭：「呢班友之前扮曬想買我地啲藥，實際就早部署好要對付我地！可惡！」

我就心諗：點解呢隊人遲唔嚟早唔嚟，偏偏要喺我上咗個韓國佬身嘅時候先嚟！

「美國隊長」拎住部iPad，click咗幾吓，播放出一段錄音：

「波士果然英明！家陣喪屍嘅數量超過八成，對家一定好心急，唔想俾情況再惡化……」

呢段錄音咪就係油頭仔同個韓國佬之前嗰段對話？！





嗰陣條「美國隊長」俾人發現鬼鬼鼠鼠，匿喺門口出面，原來佢喺度做間諜玩錄音。

「……所以就算貴多20%甚至30%，佢地都可能會應承。」

呢句完咗下一句輪到韓國佬講嘢。

佢講嘅係韓文，而段錄音一路播，部iPad就一路同時翻譯：

「30%？哈哈哈！我鍾意呢個數字！不如就加到30%，今次你提議得好！」





「哈哈哈！我都係跟波士你學嘢啫。」

「雖然情況一切都好順利，不過我始終有啲擔心，驚我地放病毒出去嘅事會有人知。」

「呢層你放心，我地保密得咁嚴密，一定無人知隻喪屍病毒係我地放出嚟。」

「咁又係嘅，當時我地派人上街播毒嗰陣，專登揀咗啲閉路電視影唔到嘅位置，絕對可以話係神不知鬼不覺！哈哈哈！」

喺呢段對話中，個韓國佬基本上認曬所有嘢，直頭水洗都唔清。