我無啦啦同隻芝娃娃交換咗身體，跟住無啦啦又遇上喪屍大爆發: （67）

「證據確鑿，金元彬你仲有咩解釋？」聯合國鬼佬問我。

「太好啦！你終於俾機會我解釋！首先我唔係金元彬，真正嘅金元彬喺我手上呢隻八爪魚。」

我揭開手上隻碟個蓋，將隻八爪魚展示俾佢地睇：

「成件事聽落可能有會啲匪夷所思，但事實係我同金元彬交換咗身體，佢變咗呢隻八爪魚，我就上咗佢身變成咗佢！亦即係話，真正嘅主謀係呢隻八爪魚，而唔係我！你地明唔明？」

……





……

聽完我一番說話，全場靜咗五秒。

「波士，將罪名嫁禍俾八爪魚咁絕嘅『橋』都諗得出，真係估你唔到！今日我又學到嘢！」油頭仔對我表示出崇高嘅敬意。

我「唉」咗一聲，都唔知點應佢好。

至於同場嘅翻譯員則一臉詫異咁將我段說話，翻譯成英文俾兩個鬼佬聽。





「Ridiculous！」

呢個就係對方對我以上一番解釋嘅評價。

雖然聽落真係好荒謬，但的而且確卻係事實。

「你兩個都幫手一齊解釋吓啦！」我同企埋喺一邊嘅Irene、阿明講。

「其實佢無講大話，呢條友真係有交換身體嘅能力，我都係同佢交換咗身體而變咗男人！」





「係呀係呀，我可以做證！」

「Bullshit！」聯合國鬼佬覺得我地一派胡言。

睇嚟呢刻唯一可以幫我作證嘅，就只有條八爪魚，弊就弊在隻嘢離開水太耐，家吓奄奄一息。

「喂！你唔好死呀！快啲講句嘢啦！」我lur啲口水落去，試圖救返醒佢。

可惜卻一啲用都無。

就喺我嘗試拯救八爪魚嘅同時，再有三個部隊嘅人行入嚟會議室。

當中有兩個人我係識得嘅。

一個係「亞狗」，亦即係我最原本嘅身體！





一個係四眼仔，當時用電鋸鋸到我就嚟死嗰條粉腸！

估唔到！估唔到居然會喺呢度，再遇返自己最本來嘅身體！

無記錯嘅話，聯合國部隊招攬咗部分生還者入伍，所以佢地兩個先會出現喺呢度。

「我地三個同其他人已經摷勻成個基地，但係都搵唔到解藥喺邊。」四眼仔同聯合國鬼佬匯報。

聯合國鬼佬面色一沉，然後行埋嚟捉住我衫領，非常憤怒咁質問我：「Where’s the antidote?」