我無啦啦同隻芝娃娃交換咗身體，跟住無啦啦又遇上喪屍大爆發: （69）

油頭仔對住個掣，用力㩒落去。

下一秒，地下突然有兩塊板分開。

原來真正嘅機關係喺檯底！

我同油頭仔，連埋啱先飛落地下嘅八爪魚，同時間一齊向下急墜。

我地沿住下面一條暗道「sir」落去。





本來以為神不知鬼不覺，殊不知喺機關門準備閂埋嗰吓，「美國隊長」發現咗我地想逃走。

佢飛身喺門嚹度攝入嚟，同我地一齊「sir」咗落去。

真係唔知呢條暗道係邊個設計，轉完一圈又一圈，轉到個人就嚟暈咁滯先落地。

有一陣臭味傳過嚟，驟眼望去，四周圍放置咗一袋二袋垃圾，估計所達之處係基地嘅垃圾站。

隻八爪魚先落地，油頭仔就第二，我就緊隨其後。





頭先轉咗咁多個圈，油頭仔轉到暈陀陀，連企都企唔穩，直接仆咗落一堆垃圾袋上。

正當我伸手想起扶佢之際，「美國隊長」已經落到地面，並第一時間從後捉住我。

「25年前你走得甩，但今次遇到我，你無咁好彩架啦！」佢用帶口音但尚算流利嘅廣東話同我講。

「乜嘢25年前？我都話咗我唔係金元彬！快啲放手啦！」我拼命掙扎。

「真係可笑！唔認罪嘅人我見得多，唔認係自己就真係第一次見！」





「美國隊長」對我講：「25年前，你喺釜山經營藥廠，由於管理不善而虧蝕咗好多錢。後來有個美國商人慷慨咁注資落你公司度，不過你好快又使曬筆錢，仲爭落一大筆債。」

「你同我講呢啲無用架，我根本就唔係金元彬！」我指住地下嗰隻八爪魚，「你要搵就搵佢算賬啦！」

對方唔理我，繼續講：「當時你再去求個美國商人注資，但遭到拒絕。走投無路之下，你故意製造一種致命病毒，並喺釜山廣泛散播，然後想以高價賣俾政府。不過可惜，到最後都係俾政府嘅人識穿咗。」


「當時你身為公司主席，本來係難辭其咎，但你居然將全部罪名推落個美國商人身上，結果你無罪釋放，相反嗰個美國人就被判囚三十年，最後含冤死於監獄之中！」

「而我就係嗰個美國人個仔！我係嚟搵你尋仇架！」

條友噴到我一面屁，仲要鬧啲完全唔關我事嘅嘢。