我無啦啦同隻芝娃娃交換咗身體，跟住無啦啦又遇上喪屍大爆發: （68）

「頂！都話我乜都唔知！呢隻八爪魚先係主謀！」我指住碟上面嘅八爪魚。

聯合國鬼佬Chris惱羞成怒，一手啪走我手上隻碟，上面隻八爪魚直接飛咗落檯底。

跟住條友單手捏住我條頸，再鄭重咁問我一次：「Where' s your antidote！」

「I…don' t…know…」我幾乎抖唔到氣。

而油頭仔作為一個忠誠嘅下屬，佢一見到我有事，就即刻出手護主。





「死鬼佬快放手！」佢撲埋去用牙咬Chris隻手。

對方唔縮手佢就唔鬆口。

「Shit！」大約三秒後，Chris痛到頂唔順縮開咗隻手。

佢身後班𡃁睇唔過眼，掹雞想開槍對付我地。

但係Chris大嗌「stop」，叫佢地唔好開槍。





理由好簡單，喪屍病毒嘅解藥仲喺我地手上，佢地一日未搵到解藥，一日應該都會留住我地條命。

Chris隨後吩咐四眼仔同「亞狗」等人，出去再仔細咁搜索一次成個基地，務求要搵出解藥。

「『亞狗』唔好…」

正當我想開聲挽留自己原本嘅身體，Chris又行到我面前，並作出嚴厲警告：

「金元彬，你出面班手下已經投曬降，你走唔甩架啦，精嘅就快啲從實招來，否則咪怪我地唔客氣！」





佢身後嗰班𡃁收起支槍，拎出粗長嘅伸縮棍。

一個二個摩拳擦掌，睇嚟想對我地嚴刑逼供。

除咗主腦金元彬之外，我相信油頭仔應該都知道解藥收埋咗喺邊。

佢咁聽我話，或者我可以命令佢講出嚟，咁樣就免得大家受皮肉之苦。

然而我都未開口叫油頭仔供出地點，佢就主動開聲：

「解藥就喺呢間房！四面墻後面其實係一個倉庫，解藥就收埋咗喺呢度！喺screen後面有一個開關，只要㩒一吓，咁就會觸動機關，四面墻就會隨之打開。」

油頭仔講完呢番說話之後，就指向會議室嘅投影幕。

而呢刻我心入面係鬆咗一口氣，心諗唔使俾人嚴刑逼供，實在太好啦。





Chris派其中一個人揭開塊幕布，正如油頭仔所講，screen後面確實係有一個紅色嘅按鈕。

當手指輕輕一按落去，突然間，成間會議室嘅燈全部熄曬！

房間之內即時漆黑一片！

「波士呢邊！」油頭仔呢個時候拉我捐入檯底。

原來喺檯底底下都收埋咗一粒紅色嘅掣。