我無啦啦同隻芝娃娃交換咗身體，跟住無啦啦又遇上喪屍大爆發: （72）

憑借住相當猛烈嘅火力，我地沿途擊倒咗唔少擋路嘅敵人。

轉過好幾個彎，行咗好一段路，我地卒之嚟到油頭仔所講嘅另一個出口。

鋼鐵製嘅大門前，停泊咗一架小型潛艇。

剛才我地打低咗咁多人，估計已經無人再嚟阻撓我地。

只要坐上潛艇，咁我地就可以駛離基地。





偏偏喺呢個時候，突然有人從後開槍射我隻腳。

好彩粒子彈射歪咗少少，我大髀只係擦傷咗。

擰轉頭一望，開槍嘅係嗰個四眼仔，喺佢隔籬仲有亞狗。

唉！仆佢個臭街！又係呢條四眼仔！

我做喪屍嗰陣，呢條友就揸電鋸想冧我，依家又開槍射我，點解佢硬係要同我過唔去？！





「金元彬！你放啲喪屍病毒出嚟，害死咗咁多人！我地一定要將你繩之於法！」

「汪汪！汪汪！汪汪汪！」

「亞狗！一齊開槍『啡』佢！」

估唔到亞狗連槍都識開，佢同四眼仔向我地開火。

由於手頭上嘅鋼珠炸彈已經用曬，我同油頭仔只能用潛艇做掩護，同對面展開槍戰。





我叫油頭仔淨係瞄住四眼仔一個嚟射，話曬「亞狗」係我原本嘅身體，我當然唔想自己受傷。

「砰！砰！砰！砰！砰！砰！砰！」

我地用潛艇做掩護，佢地就匿喺角落頭度，大家各不相讓，不斷開槍射擊。

經過一輪猛烈嘅駁火，話咁快雙方都射曬手頭上嘅子彈。

接下嚟要分出勝負，咁就要用返最原始嘅方法。

四眼仔同亞狗採取主動，衝埋嚟用拳頭攻擊我地。

雖然唔想傷害自己原本嘅身體，但咁嘅情況真係無辦法，逼於無奈我都要還手。

我擋開亞狗嘅拳頭，然後一掌將佢推開。





四眼仔即刻幫亞狗還擊，一個爭頭批埋嚟，今次我擋唔到，心口食到應一應。

油頭仔幫拖，用膝頭攻擊四眼仔，可惜俾對方擋咗。

之後我地四人展開混戰，你一拳我一腳，互相攻擊。

而喺四個人入面，條四眼仔係最好抽，佢出盡力打到我同油頭仔趴低。

之後佢仲用鎖技將我壓制落地下。

佢捉住我一隻手向後拗，兩隻腳就鉗住我個身唔俾我郁：「金元彬，你走唔甩架啦！乖乖地投降吧啦！」

「都話咗我唔係金元彬...」我被徹底鉗製，除咗把口講到嘢之外，手腳都郁唔到。





「波士我嚟救你！」油頭仔先擺脫亞狗，然後衝埋嚟向四眼仔拳打腳踢。

只不過，四眼仔卻不為所動，死都要鎖住我。

隨即油頭仔就使出佢最常用嗰一招——擘大口用牙咬。

佢一啖咬落四眼仔隻手臂，有咁大力就咬咁大力。

上次佢咬到Chris放手，然而今次四眼仔撐到好恆，死忍住痛都唔鬆手。

旁邊嘅亞狗見到同伴有危險，於是根據佢最直接嘅本能反應，撲去咬油頭仔膊頭。

痛楚無令油頭仔鬆口，反而咬得再大力一啲。

「仆街！」鎖住我嘅四眼仔痛到擸埋口面，但卻依然唔肯鬆開手。





直至痛到某個程度佢頂唔順，居然咬我隻手嚟出氣發洩。

每當我一被咬，咁就會同對方交換身體。

四眼仔咬落嚟，我就同佢交換咗身體，而同時間油頭仔又咬住四眼仔。

因此，我上咗四眼仔個身唔夠兩秒，就又同油頭仔調換身體。

至於油頭仔又俾亞狗咬實唔放，當我一上到佢嘅身，接住好快又打咗個冷震，最後我再同亞狗身體互換。

以便大家理解，成個身體轉換嘅過程，我用代號簡單展示一次：

「<」代表咬。





我<四眼仔<油頭仔<亞狗

每咬一次就交換一次身體，去到尾我上咗亞狗身，亦即係返到去自己最原本嘅身體！