我無啦啦同隻芝娃娃交換咗身體，跟住無啦啦又遇上喪屍大爆發: （73）

我第一時間檢查吓全身上下。

好在都算係無穿無爛，就連身上嘅私人物品包括銀包、鎖匙同電話都無少到。

銀包入面身份證、八達通都喺齊度，部電話都keep得好。

我隨手掂一掂個mon，主頁就彈出幾個訊息提示。

係個泰國巫師send message俾我，發送時間係喪屍爆發後嗰一日夜晚。





內容係一堆泰文，所以我睇唔明。

「點解我嘅身體會變成咁架？我變咗金元彬？」

「做乜我戴住眼鏡嘅？我變咗四眼仔？」

「汪！汪汪汪」

經過剛才咗一輪連續嘅身體交換，除咗我返到自己本來嘅身體之外，其他三個人嘅身體就調到亂曬籠。





「大家聽我講幾句！」

「亞狗，乜你原來識得講人話？」「金元彬」望過嚟對我講。

「你話我聽，我係咪變咗四眼仔？」「四眼仔」問我。

「汪汪汪汪！」「油頭仔」就對住我吠。

我吸啖大氣，大聲叫停佢地：「唔好嘈！你地唔好講嘢！靜靜地聽我講！」





等佢地都靜曬，我先再講：「我地頭先四個人分別交換咗一次身體！無推斷錯嘅話，四眼仔你上咗金元彬嘅身。」

然後我再指住油頭仔話：「至於你就同四眼仔調換咗身體，而亞狗就上咗你油頭仔嘅身。」

「所以波士你就上咗呢個毒撚嘅身？」油頭仔問我。

我「唉」一聲歎氣，行到對方面前，好認真咁講：

「呢個毒撚其實就係我本人，我之前同Chris講嘅說話全部都係真話。我並唔係你波士，你真正波士早就同我交換咗身體，變咗嗰隻八爪魚。」

上咗四眼仔身嘅油頭仔聽完我呢番說話，居然無表露任何驚訝之情，反而苦笑咗一聲。

「你笑咩呀？」我問。

「唔怕老實同你講，其實我早就察覺到你唔係我波士本人，只係我一直都唔肯承認。」





「你係點發現架？」

「因為我同金元彬早就約定好，一旦陰謀俾拆穿，佢就會將全部罪名推卸俾我，我就以此換取巨額嘅安家費，只但係，你竟然無對我咁做。」

我無出聲，俾佢繼續講。

「換轉係金元彬，頭先佢應該一早就dum低我，自己揸潛艇走咗佬，唔似得你咁憨居留喺度，同我一齊作戰到最後。」

油頭仔再次流露出苦澀嘅笑容：「不過睇嚟我都係走唔甩架啦。」

佢嘅眼神望向前方，我順住佢嘅視線擰轉頭一睇，Chris正帶住一班手下到場。