殘酷暗戀物語【最終部曲】: 所有遺失的東西
｛所有遺失的東西—泳兒｝
我曲膝挨住床邊坐底：「你今朝做咩咁嬲吖？」
「因為我一知道區嘉桐咁樣恰你，我就無名火起，我唔會俾佢得逞。」從郭家朗嘅語氣，可以聽得出佢仲未消到啖氣。
「唔可以吖。」我嘆道。
「...同埋我哋喺學校嘅時候，可能都要見少啲，如果唔係啲人就會估，相入面個男仔係你。」發生咗呢件事已成定局，我更加唔敢講，上次佢頂撞訓導主任嗰件事鬧到咁大，已經引起班上面一啲揣測。
「不過好彩啲相唔夠清咋，影唔到你個樣。」所以點都好，我唔想連累佢。
「影到咪又由佢影到，我寧願同我呢個咁可愛嘅女朋友一齊承擔後果，都唔想你下下都要自己一個攬晒啲痛苦喺身。」佢語氣帶點不忿，雖然我哋喺呢件事上面達成唔到共識，不過佢都有遷就我嘅意願，盡量喺學校嘅時候少咗見面。
於是時間就係咁，一日一日咁過。
喺屋企，佢每晚會主動陪我傾電話，所以即使屋企得返我同叔叔兩個人獨處，佢都可以知道我嘅安全。不過就算叔叔偶爾對我做啲咩，我都寧願呃住佢，因為我始終好驚佢會覺得我好污糟，然後揼低我。再加上，以佢衝動嘅性格，可能會直接衝入嚟同叔叔當面對質，我唔希望俾媽咪知道呢啲事，我唔想搞到媽咪再次失去依靠。
我好理解媽咪佢好需要呢個叔叔嘅經濟支持，如果唔係我哋依然仲屈居喺親戚屋企，至少而家我叫做可以有自己間睡房，所以我選擇繼續啞忍，喺佢面前做返一個正常可愛嘅女朋友。
但喺學校，我唔敢同佢走得太近，而間唔中我仲會聽到啲男同學喺我背後講啲好難聽嘅說話，我有聽過啲人話我係PTGF，又討論我係唔係處女，最過份嘅試過有人問我今晚放學又要同邊個男仔過夜，我以為時間可以沖淡呢啲閒言閒語，但原來每次聽到都仲係會好難受。
有時候，當啲同學講緊我是非嗰陣，曾皓賢會故意拉走我，同我講啲無厘頭嘅笑話，我問佢：「你咁樣做，唔怕啲同學喺背後講你咩？」佢嘅反應係…
「怕咩啊？王樂兒你唔好次次都諗住自己一個人承受晒所有嘢啦。」曾皓賢揚一揚眉，笑著對我說。
點解佢同郭家朗講嘅嘢咁似。
＊＊＊＊＊＊＊＊＊＊＊＊
轉眼間踏入十二月，校際排球比賽響呢段時間進行得如火如荼，但自從我哋女子組喺八強出咗局之後，就剩返男子組繼續向住爭冠目標邁進。
當其他年級已經開始放緊聖誕假嘅時候，係得我哋中六生今日仲要返學補課，我諗住趁小息行出走廊透吓氣嘅時候，陳柏希急步行過嚟拍拍我膊頭：「王樂兒，終於搵到你！你聽日真係諗住唔嚟睇我哋比賽？」
「嗯，要溫書吖，過埋聖誕假就要考MOCK。」男子組決賽喺聽日平安夜嘅中午十二點舉行，之前淘汰賽嗰陣我已經冇去到，我怕我會影響佢表現，但係我更加怕要同觀眾席啲同學或者隊友一齊坐，所以我婉拒咗陳柏希嘅好意。
「咁啊？但係…如果你嚟嘅話，家朗落到場會更加有衝勁。」陳柏希個樣明顯係有啲失望，我知佢係想幫郭家朗說服我嚟睇比賽，但我之前已經同咗郭家朗講好咗，比賽嗰日我想留返喺屋企多啲。
「你再考慮吓啦，希望聽日見到你。」陳柏希見我喺度沉思冇出聲，就冇再強逼我應承佢去睇比賽。
唉，我都係唔去喇，我去到又咪係自己一個人孤伶伶咁坐喺觀眾席，曾皓賢又唔鐘意睇運動比賽，一諗到要同旁邊啲同學相處，甚至乎可能又喺我背後講我點點點，我寧願留喺屋企自己溫書。
呢晚我同郭家朗講唔使傾電話喇，我想佢早啲瞓，抖足精神聽日比賽。
而既然難得聽朝唔使返學，我喺度諗不如唔好較鬧鐘，瞓到自然醒算，但係唔知聽日比賽會點呢，諗吓諗吓就迷迷糊糊咁瞓著咗。
第二朝，我俾窗邊隻雀仔吱吱渣渣唱歌咁整醒咗，我擘大對眼第一件事係摸吓部手機擺咗喺邊，然後睇吓而家幾點。
—11:41 AM—
喔，原來已經係十一點幾喇，比賽十二點正開始，咁即係佢哋已經喺體育館入面熱緊身喇，我再望下排球隊同6A班個Whatsapp群組，有成三四j1十條未讀訊息，啲新訊息仲喺度不停咁彈緊出嚟。
我㩒入去睇吓佢哋講緊咩，首先過濾咗一堆「未起床啊」、「仲搭緊車啊」、「我到喇！你哋喺邊啊」等等嘅報到式對話之後，再碌落去就開始見到體育館場內嘅相，同埋班同學喺觀眾席合照嘅相，然後終於到班男仔賽前熱身嘅相。
只要張相入面有佢，我都會放大嚟睇。
我攤喺張床度睇住佢啲相，過咗一陣，我發覺自己竟然睇到入晒神，明明今日應該係要做返啲正經野，就係溫書！呢刻我好似聽到心入面有把聲同我講：「喂！起身啦王樂兒。」
「好囉！唔睇囉。」於是乎我扔低部電話，然後出盡全身氣力掙脫綿被嘅包圍，行去廁所刷牙洗面同梳返好啲頭髮，喺塊鏡面前，我望住自己個樣，剩係見到一個面容憔悴嘅女仔，我雙手拍拍自己臉頰。
嗯，振作啲啦，王樂兒。
我行返去睡房，閂埋房門，拎返張綿被包住自己，坐低開始溫書，但係對住枱面本中文書，掀起掀去都唔知溫咩好，掀掀吓去到《出師表》嗰頁，我又諗返起嗰日郭家朗喺操場度幫我包紮傷口，然後叫我send個默書範圍俾佢當做補償，跟住我就忍唔住望吓手機睇吓有冇佢嘅新相分享出嚟。
唉，咁樣溫書都唔係辦法，不如攞啲Past Paper出嚟做吓算啦，但做做吓我又停低支筆，左手托住個腮長嘆一聲，我諗起曾皓賢之前同我講，唔好咩都自己一個承受晒。我望住啲短訊，可以想像得到佢哋而家個比賽氣氛肯定好熱鬧，但再望吓自己面前份Past Paper。乜...我真係想溫書咩？
時鐘上面嘅秒針，滴答滴答咁移到十二點鐘方向，比賽終於開始啦，你要加油啊知唔知。
我索性熄咗電話個熒幕，嘗試逼自己集中返精神落份Past Paper度，不過做唔夠兩題又攞返出嚟睇，我對住個熒幕唔知等咗幾耐，仍然都係冇新訊息或者新相彈出嚟，我不自覺咁又長嘆一聲。
唉，王樂兒你喺度做緊咩啊。
算啦，既然集中唔到溫書，不如去廚房搵啲嘢食填下肚，妨且我由起身到而家都仲未食過嘢，個肚都開始有啲餓餓地。我著返對白色毛毛拖鞋行返出睡房，但隱約聽到收音機喺度播緊天氣新聞：「受到東北季候風影響，天文台預料本港氣溫將會顯著下降，預料市區氣溫最低為十二度...」
頭先喺睡房溫書嘅時候，我一直用張綿被包住自己個身，但係而家我剩係著住件Hoodie同短褲，行出廳嗰陣已經覺得有啲寒寒地，頭先梳洗嗰陣都冇咁凍㗎，點解突然間凍咗咁多㗎。
但咪住先，明明今朝屋企應該剩係得我一個人，媽咪同叔叔理應一早出咗門口返工，點解無啦啦會有收音機響嘅？我望一望叔叔間房係閂埋咗，再確認埋廁所門都係閂埋咗，客廳一眼望晒冇人喺度，仔細一聽，收音機聲正正喺廚房傳出嚟，我戰戰競競咁向住廚房方向，一步一步咁探路，但因為廚房位處於客廳左面嘅轉角位，呢一刻我冇辦法望到入面係咩狀況。
當我越行越近嘅同時，收音機聲亦都越嚟越響。
直至我行到轉角位，正準備轉入廚房之際，收音機就喺呢一瞬間靜止咗。
而我眼前見到嘅，係一個著住白色長袖底衫，灰色綿質長褲嘅中年大叔，企咗喺廚房裡面摵緊香蕉皮。
同埋笑瞇瞇咁望住我。