我想喺夜場搵真愛，你陪唔陪我癲？: 十六.

「你行得未？」我喺Whatsapp問佢。

「而家落緊嚟，你去C出口等我。」佢覆我。

我行到出C出口，然後企咗喺條柱後面一直摷個頭，勁驚個頭唔好睇。

摷咗一輪之後，我突然諗到一個問題。

佢會唔會要買飛？然後…





我就買定咗張去中環嘅飛。

我望住手錶上嘅秒針，佢好似越跳越快咁，就好似我嘅心跳一樣。

C出口落嚟嘅樓梯傳嚟腳步聲，然後我就好似啲小學生咁突個頭出去偷睇。

但好可惜，唔係佢，亦都好慶幸唔係佢，因為我仲未Ready。

我慢慢調整呼吸，但係無論我用咩方法都好似冇咩進展。





然後…佢到咗。

當然，唔止佢一個，仲有佢兩個Friend，一男一女。

「你洗唔洗買飛？」我將隻手隊落褲袋，準備好似拔槍咁拎張飛出嚟。

「唔洗，但我要增值。」佢行向客務中心。

我趁佢唔注意，走埋一邊將張飛揼落垃圾桶。





「做多咗啦。」我細聲同自己講。

我跟住佢哋上車，一句嘢都冇講，而佢哋就喺到傾緊佢哋嘅嘢。

嚟到中環，佢終於問我嘢。

「你有冇做快測？」Clover問我。

「做咩？」我唔明佢問嚟做咩。

「冇快測唔入得。」

聽到呢到，我即刻慌撚咗，已經做好曬炒車嘅準備，不過好彩有人幫手搞掂咗，我哋都好順利咁入到場。