我想喺夜場搵真愛，你陪唔陪我癲？: 五十一

經過咗八個半個循環，終於嚟到下星期五。

點解係八個半個循環？

因為當你嘅生活冇任何特別，每一日都過得一模一樣嘅話，其實嗰個唔係新一日，而係你開始無改變嗰日嘅循環，而過咗八個半循環，即係過咗八日半。

我唔知我講緊乜鳩？咁恭喜你層次高過我、生活精彩過我。

你知我講緊咩，然後身同感受？咁你同我一樣都係大都市裡面嘅「正常人」。





你知我講緊咩，然後感同身受？收皮啦撚樣，我先唔撚信。

其實我都唔想咁，我都好想將「一個循環」變成「一日」。

而我去將「一個循環」變成「一日」嘅方法就係…

搵女朋友。

你冇聽錯，就係搵女朋友。





正確啲嚟講係喺我嘅幻想世界裡面搵佢，因為現實嘅佢…

根本唔得閒。

「你日日都搵女，咪又變咗日日都一樣！」

咁又唔可以咁講。

「咩唔可以咁講，你就係圍住條女轉！」





好，駁唔到。

夜晚七點，我同佢嚟到觀塘。

因為大家都未到，所以我同佢去咗Partyroom附近嘅超市買酒。

雖然我平時冇做運動，但拎兩袋酒都唔算係咩大問題。

應該係話，有問題都要變到佢冇問題，因為咁大個男人拎兩袋酒都搞唔掂真係有少少柒。

暫時都冇咩問題。​​​​​​​