中六個年 我鍾意左叫我起身個女仔: 籃球比賽（五）

嚟到第二場比賽，對手係中六第二強嘅班別。

只要打低佢地，跟住就會淨返中四同中五各一班。

對比上一隊，佢地冇射手，全部都係可以撞死人嘅大隻佬，可以強行撞開曬眼前所有阻住佢前進嘅生物，然後上籃，但係敏銳度極低。

上一場比賽負責跳波嘅文迪再次發功，雖然冇拎到個波，但係都將個波拍咗嚟我呢邊。

我一個箭步向前，即刻就有人上嚟阻我，係孫嬴。



雖然話佢嘅敏捷度低過我好多，但係對於咁耐冇打波嘅我嚟講，呢個都係一個好大嘅挑戰。

我係佢面前好似小丑咁花式運球，但係始終都Fake唔走佢。

當下嘅我已經有少少燥，本來諗住用返上一場嘅賤招，但喺我準備起手嘅時候，眼角瞄到係看台上面嘅向晴，佢甚至企埋起身為我打氣。

都有可能只係我諗多咗，佢唔止為我一個打氣，但係我知無論如此，我都唔可以令佢係今日之後話我係一個淨係識用賤招嘅垃圾。

與此同時，文迪已經嚟到孫嬴嘅右後方，而我就將個波從右手經過背脊傳去左手，從左邊越過孫嬴，嚟到三分線之外。



本來諗住去籃底上籃，但係見到籃底一早已經有人守緊，我自己都知自己冇可能跳得高過佢，但係我嘅投球命中率簡直係悲劇。

對面趕返嚟嘅速度快過我嘅隊友好多，如果我再唔落決定，呢一波進攻好有可能就咁收皮。

聽到後面逐漸逼緊埋嚟嘅腳步聲，我知我呢一刻得返一個選擇。

我迅速起手射波，但係我都唔期望佢入，只希望佢會撞到啲野然後彈返嚟，等我啲隊友可以搶到籃板。

「Chop！」



個波穿過左球框，同球網磨擦發出咗一下聲響，然後就係場邊好似雷咁大聲嘅掌聲。

「開心得太早，就會出事。」

我同自己講咗句咁嘅說話，之後就專注返係球埸上面。

呢個只係第一球，呢一埸激戰…仲要繼續。