中六個年 我鍾意左叫我起身個女仔: 籃球比賽(六)

雖然我哋拎到粒波，但係對於呢班手長腳長嘅友仔嚟講，要將個波搶返嚟絕對唔係一件難事。

我冇估錯，文迪係上籃嘅時候比人攔截，孫嬴搶到波之後就直接轉手傳比跑過左中線嘅孫政。

無人擋到孫政，亦都冇人夠擔擋佢，佢一個上籃就將比分拉到三比二，畢竟佢一撞過嚟，骨架都有機會比佢震碎。

之後嘅比賽，雖然我哋比搶波果陣嘅肢體碰撞搞到五勞七傷，但係都總算搶左粒波返嚟。

比分拉得好接近，嚟到比賽淨返十五秒嘅時候，比分嚟到四十比四十一，而且係由佢咃開波。



功敗垂成，我哋已經冇機會反擊。

我哋放慢腳步，接受左呢一場嘅失敗。

喺孫嬴將個波傳比係中線嘅孫政嘅時候，孫政跣左手，個波係中線出咗界，不過比賽得返五秒。

文迪拎波，而我就跑咗去三分線，因為對手對我哋嘅三分波唔抱任何希望，索性放棄咗守三分波。

文迪將個波傳咗比我，我調整呼吸，將射姿調整到一個完美嘅狀態，係吹哨嘅同時，個波離開左我隻手，向住個籃框飛過去。



呢一刻全場肅靜，睇住呢個壓哨嘅三分波。

到底我會成為傳奇，定係…咩都唔係？

「Chop！」

籃球穿過球籃，入咗。

我嗰班嘅同學即刻衝落嚟球場歡呼，但係我就完全唔知咩事。



向晴嚟到我面前，再次比一個大大嘅「Like」我。

「唔係仲有中四中五要打咩？」我問佢。'

「學校有個不成文嘅規定，中四同中五嘅班別通常會棄權，等中六可以拎冠軍，留返個回憶。」佢答我。

係佢答我嘅時候，體育科老師都拎左個獎杯嚟：「佢地棄左權啦。」

同學們一齊影完大合照之後，我就借走咗個獎杯，同向晴單獨合照咗一張。

唔知點解，睇返張相嘅時候，我發自心底咁微笑。