中六個年 我鍾意左叫我起身個女仔: 直接(五)

我推開我身邊嘅車門，之後就伸手過去向晴到諗住抱佢出嚟。

「喂，唔洗啦！」司機叫住咗我。

我望過去，見到佢開咗向晴嗰邊道門之後就落咗車。

「過嚟啦屌你，我幫你睇住後面。」佢向住我呢邊大嗌。

「唔該曬。」



我行去另一邊車門抱起咗向晴，之後司機幫我閂完門之後就返咗上車。

佢撳低車窗：「唔好咁撚灰啦後生仔，快啲送人返屋企啦。」

講完，佢就開車走咗。

我抱住佢慢慢向佢住嘅嗰棟大廈行過去，大堂保安見我咁嘅狀況，咩都無問就開咗門比我。

我以為佢會比部𨋢啲燈照醒，點知佢瞓得好稔，返到去佢屋企門口都係0反。



我抱住佢喺佢屋企門口用力搖咗幾下，佢終於擘返開隻眼。

「我點解喺到嘅？」佢問。

「你要唔要落嚟先？」

「你慢慢放。」

我慢慢放低佢，直到佢雙腳企穩先放手。



「咁你可以答我未？」佢扯咗扯個Sport Bra：「同埋點解好似怪怪地咁嘅？」

「你啱啱飲醉酒自己整到掛。」我有啲心虛。

「咁啱啱發生咗咩事？」

「Er…」我直接忽略佢嘅問題：「你返屋企休息下先啦，返到學校再同你講。」

「哦，好啦。」

佢喺褲袋摸咗條鎖匙出嚟，但係就隊極都隊唔入個鎖匙窿。

我忍住笑過去扶住佢隻手，佢開門入咗去之後就轉身諗住閂門。

「喂！」我叫停佢。



「做咩呀？你唔係話返學先講咩？」

「你真係想知？」

「梗係。」

「咁我返到學校同你講。」