中六個年 我鍾意左叫我起身個女仔: 好人

喺佢閂門之後，我都落樓搭通宵巴士返屋企。

雖然成架巴士一個人都冇，但我都係嚟到上層最後排靠住左邊窗坐低。

依家清醒返少少再諗返啱啱發生嘅事，真係好撚柒癲。

呢啲幾乎喺鹹片先會出現嘅橋段，竟然就喺啱啱發生咗喺我身上。

我拎咗部電話出嚟，撳咗入我同佢嘅Whatsapp對話框。



「我喺咪應該要關心下佢。」我喺到自言自語。

「早啲休息啦，你都攰啦。」我打咗句咁嘅嘢。

我撳咗落去傳送掣到，但係又唔知Send唔Send好，。

我撳實個傳送掣，過咗幾秒之後就拉咗去第二到鬆手。

我Del咗啱啱打嘅嗰句嘢，諗住閂Mon收埋部電話嘅時候…



「叮！」

有人Whatsapp我，係向晴。

「你可唔可以講下啱啱發生咗咩事？」佢問。

我諗咗諗，最後都冇講真話，因為佢應該接受唔到呢個事實。

「其實冇咩，你瞓着咗，隔一陣發下開口夢咁。」我講咗個善意嘅謊言。



「你講真？」

「係。」

「哦。」

我閂Mon袋返好部電話，將個頭挨喺車窗上面。

因為深夜條路冇車加上呢架車原本少人搭嘅關係，呢架車基本上只會停頭尾站。

我好快就返到屋企樓下，但我冇即刻返上去瞓，反而坐咗喺公園發佝瞀。

我點煙，一枝接一枝，直到煙盒裡面僅餘嘅煙都比我食曬。

我隨手將煙盒掟落地下，咁啱好有個啊婆經過。



佢停咗喺到：「後生仔，你搞咩呀？」

「Sorry啊。」我諗住起身執返個煙盒。

「喂！」佢喝住我：「唔洗啦，我拎比回收站個婆婆當廢紙賣，下次唔好喇。」

然後，佢就執起個煙盒行走咗。

雖然誤打誤撞地做咗件小小嘅好事，但呢件事本身係錯。

「做完壞人，你想做好人都唔一定有機會比你做返好人。」我喺到自言自語。

我返到屋企之後涼都冇沖、衫都冇換，就咁攤喺梳化上面諗住直接訓，點知結果望住個天花板望到天光先瞓得着。