中六個年 我鍾意左叫我起身個女仔: 你很好，我不好(二)

我拎起佢對鞋，然後踎係佢前面。

佢對腳真係好細，好得意，好似Minions咁。

「腳。」我拍咗拍佢右邊小腿。

佢遞高兩隻腳，方便我幫佢着。

我慢慢幫佢着上佢嗰對有Minions圖案嘅襪，順便偷偷地聞佢隻腳，然後拉鬆曬佢對高筒Converse嘅鞋帶笠落去。



我抬頭望返住佢，佢嗰個有幾分傻嘅笑，真係搞到我神魂顛倒。

「行啦。」我企起身，着返好衫褲。

「夠唔夠時間返去架？」佢開電話睇咗睇時間。

「而家幾點？」我問佢。

「六點幾啦。」



「我屋企有女仔校服。」

聽到呢句，佢即使坐後咗幾個身位：「你老味，你個變態佬肯定有易服癖！」

我反咗個白眼，已經懶得解釋。

我拎返曬所有野，然後行過去公主抱起佢：「你話點就點啦。」

我抱住佢行到去前台就放低咗佢，因為佢要搞Check Out。



前台個啊姨一邊搞，一邊偷偷地睄我兩個。

唔知係咪我諗多咗，佢個眼神好似有啲奇怪。

「啊晴？」前台擺返張身份證上台。

「啊…係呀。」啊晴有少少尷尬。

「好耐冇見。」

「走先啦。」

講完，啊晴就拎走張身份證衝咗落去。

「咩事？」我問個前台。



佢冇應我，繼續睇Youtube。

見佢冇理我，我都冇再問落去，轉身衝落去搵返向晴先。

佢企咗喺門口，個樣好似有少少不知所措。

「做咩呀？」我問佢。

「冇，唔想再傾落去啫。」佢踎低，埋起自己個頭：「有啲嘢…唔想比你知。」

「冇嘢喎，佢咩都冇講。」我扶返佢起身：「你想講咪講，唔想講都冇所謂，每個人都有過去，唔洗驚到跑走嘅。」

「我嘅過去，你唔會接受到。」



「行啦，返去換衫。」我直接轉移話題。

「你可唔可以…拖住我。」佢伸出右手。

我冇開聲答佢，只係拖起佢隻手開始行。​​​​​​​