中六個年 我鍾意左叫我起身個女仔: 澄、晴(四)

「喂，趕時間啊咁多位，即刻開始喇。」Miss插咪坐低：「啊晴去咗邊啊？」

「做咩？」啊晴舉手。

「你做咩坐咁後？坐返嚟啊武隔離啦。」

「我…」

Miss完全冇比機會佢講嘢：「快啲過返去啦，唔好蹝我時間。」



「Okay…」

佢擺到明係嬲緊我，完全唔想坐我隔離，但係Miss收到風我哋今朝前後腳返學校，佢都冇Expect我哋咁快就鬧交。

嚴格嚟講係佢單方面嬲咗我，因為我冇反擊過。

佢執好書，行到嚟我身邊：「比個位我。」

我拉前張櫈，佢喺我後面攝咗過去。



「喂。」我嘗試撩佢講嘢。

佢睥咗我一眼，然後繼續寫筆記。

「喂。」我再嗌一次。

「想點啊？」佢有少少唔耐煩：「專心啲上堂得唔得？」

「你唔好嬲啦。」我借啲意挨埋去。



佢一掌拍落我背脊：「同我躝返去。」

我即刻坐返直個人，懷疑連個靈魂都比佢拍埋出嚟。

見唔對路，我都冇再講落去，拎咗本書出嚟睇。

睇完書，我哋都啱啱好落堂。

啊晴最後三堂都喺地下上，上完就可以直接走，所以佢會拎埋袋落去。

佢將啲書擺曬落櫃桶，然後就拎袋諗住衝出門口。

我褪後張櫈擋住佢：「唔好走住先。」

佢反咗個白眼：「講真，我憑咩嬲你？」



講完，佢就爬過自己張櫈，然後衝咗出去。

我嘆咗啖氣，攤喺張櫈上面。

Miss拎住疊書行咗嚟我身邊：「啊武。」

我企起身：「我去廁所。」

「想講兩句啫，洗唔洗走佬啊？」佢攤開雙手，成條走廊比佢擋住曬。

「咁你都擋曬成條路啦，唔通我推冧你咩？」我有啲無奈：「有咩想講就快啲講啦，我真係急尿。」

佢輕輕搭住我膊頭：「唔係個個都唔介意你廢架，你氹返人啦。」



「嗯，然後呢？」

「為人師表嘅，唔講咁多啦。」

「我同佢唔係你哋諗咁樣。」

「我唔知你哋啦。」

講完，佢就走咗出去。